नवरा-बायकोचं असं काय झालं की नवऱ्याने बायकोला थेट दवाखान्यातच धाडलं, नेमकं काय घडलं?

सोलापूर / सागर सुरवसे : अक्कलकोट तालुक्यात एक धक्कादायक घटना उघडकीस आली आहे. कौटुंबिक वादातून नवऱ्याने बायकोचा कान उपटून काढल्याची घटना दोन दिवसापूर्वी घडली आहे. या घटनेत पत्नी जखमी असून, तिच्यावर अक्कलकोट येथील शासकीय रुग्णालयात प्राथमिक उपचार करून पुढील उपचारासाठी सोलापूर शासकीय रुग्णालयात दाखल केले. याप्रकरणी अक्कलकोट पोलिसांनी आरोपी नवऱ्याला अटक केली आहे. अंबजप्पा जमादार असे आरोपी पतीचे नाव आहे. या घटनेचा पुढील तपास अक्कलकोट दक्षिण पोलीस स्टेशनचे अधिकारी करत आहेत.

किरकोळ वादाचे हाणामारीत पर्यावसन झाले

अक्कलकोट तालुक्यातील उटगी गावात नवरा आणि बायकोचा किरकोळ वाद झाला होता. त्यानंतर वादाचे पर्यावसन हाणामारीत झाले. त्या मारहाणीत चिडलेल्या नवऱ्याने रागाच्या भरात आपल्या पत्नीचा कान धरून जोराने ओढल्याने पत्नीचा कानच फाटून बाजूला झाला. विजयालक्ष्मी जमादार असे या गंभीर जखमी झालेल्या पत्नीचे नाव आहे.

नवऱ्याच्या पत्नी गंभीर जखमी

नवऱ्याने रागाच्या भरात केलेल्या हल्ल्यात विजयालक्ष्मी जमादार या गंभीर जखमी झाल्या आहेत. जखमी विजयालक्ष्मी यांच्यावर सोलापूरच्या शासकीय रुग्णालयात उपचार सुरु आहेत. दरम्यान, आरोपी पती अंबजाप्पा जमादार याच्यावर भादवी 325 कलमाअंतर्गत गुन्हा दाखल केला असून, पोलिसांनी आरोपी अंबजप्पाला अटक केली आहे.