दाऊद इब्राहिमच्या घरी पोहोचला होता कपूर घराण्यातील हा अभिनेता; पुढे जे घडलं ते धक्कादायक

बॉलिवूड आणि अंडरवर्ल्ड यांचे संबंध हा अनेक वर्षांपासून चर्चेचा विषय राहिला आहे. मात्र कपूर घराण्यातील ज्येष्ठ अभिनेते ऋषी कपूर यांनी त्यांच्या आत्मचरित्रात केलेला एक खुलासा आजही अनेकांना आश्चर्यचकित करतो. ऋषी कपूर यांनी त्यांच्या ‘खुल्लम खुल्ला’ या आत्मचरित्रात कबूल केले आहे की त्यांची कुख्यात गुन्हेगार दाऊद इब्राहिम याच्याशी दोन वेळा भेट झाली होती.

ही घटना 1993 च्या मुंबई बॉम्बस्फोटांपूर्वीची आहे. त्या काळात दाऊद इब्राहिमची प्रतिमा आजच्यासारखी भारताचा शत्रू किंवा आंतरराष्ट्रीय दहशतवादी अशी नव्हती. 1988 मध्ये ऋषी कपूर आपल्या मित्र बिट्टू आनंद यांच्यासह गायिका आशा भोसले आणि संगीतकार आर डी बर्मन यांच्या कार्यक्रमासाठी दुबईला गेले होते.

दुबई विमानतळावर उतरल्यावर एका अनोळखी व्यक्तीने त्यांच्याकडे येत फोन दिला आणि दाऊद साहेब बोलतील असे सांगितले. फोनवरून दाऊदने चहासाठी निमंत्रण दिले. कलाकार म्हणून विविध लोकांशी भेटणे ही सामान्य बाब असल्याचे वाटल्याने ऋषी कपूर यांनी हे निमंत्रण स्वीकारले.

यानंतर त्यांना आलिशान रोल्स-रॉईस कारमधून एका ठिकाणी नेण्यात आले. तेथे स्वतः दाऊद इब्राहिमने त्यांचे स्वागत केले. ऋषी कपूर यांच्या मते, या भेटीत दाऊदने अत्यंत आदराने वागणूक दिली. चहा-बिस्किटांची मेजवानी झाली आणि वातावरण पूर्णपणे मैत्रीपूर्ण होते. दाऊदने ऋषी कपूर यांना भविष्यात कधीही आर्थिक किंवा अन्य मदतीची गरज भासल्यास निःसंकोचपणे सांगण्याची ऑफरही दिली होती.

दुसरी भेट शोरूममध्ये

पहिल्या भेटीनंतर सुमारे वर्षभराने, 1989 मध्ये, ऋषी कपूर आणि दाऊद यांची पुन्हा एकदा अनपेक्षित भेट झाली. त्या वेळी ऋषी कपूर आपल्या पत्नी नीतू सिंग यांच्यासोबत दुबईतील एका बुटांच्या शोरूममध्ये खरेदी करत होते.

याच दरम्यान दाऊद इब्राहिम आपल्या अंगरक्षकांसह तेथे आला. ऋषी कपूर यांना पाहताच त्याने त्यांची ओळख पटवली आणि मोठ्या आपुलकीने संवाद साधला. इतकेच नाही तर शोरूममधून त्यांना हवे ते सामान खरेदी करण्यास सांगितले आणि त्याचे बिल स्वतः भरण्याची तयारी दर्शवली. मात्र ऋषी कपूर यांनी नम्रपणे हा प्रस्ताव नाकारला.