‘मला अनफॉलो करा पण..’, CJP च्या आंदोलनावर अंकिता वालावलकरची प्रतिक्रिया, म्हणाली- ‘त्यावेळी तुम्ही…’

NEET पेपरफुटी प्रकरणावरून देशभरात विद्यार्थ्यांकडून निषेध व्यक्त केला जात असून, केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी करत दिल्लीसह देशभरात अनेक ठिकाणी आंदोलने करण्यात येत आहेत. दिल्लीतील आंदोलनादरम्यान पोलिस आणि आंदोलक यांच्यात धक्काबुक्की झाल्याचे तसेच काही आंदोलकांना ताब्यात घेण्यात आल्याच्या अनेक बातम्या समोर आल्या आहेत. या संपूर्ण प्रकरणावर अनेक कलाकारांनी आणि सेलिब्रिटींनी सोशल मीडियाच्या माध्यमातून आपापल्या भूमिका मांडल्या आहेत.

याच पार्श्वभूमीवर ‘बिग बॉस मराठी’ फेम आणि ‘कोकण हार्टेड गर्ल’ म्हणून ओळखली जाणारी अभिनेत्री अंकिता वालावलकर हिने केलेली सोशल मीडिया पोस्ट चर्चेचा विषय ठरली आहे. विद्यार्थ्यांच्या आंदोलनाला पाठिंबा देण्याऐवजी तिने निवडक घटनांवर होणाऱ्या आंदोलनांबाबत प्रश्न उपस्थित केले आहेत.

काय म्हणाली अंकिता वालावलकर?

अंकिता वालावलकरने आपल्या इन्स्टाग्राम स्टोरीवर एक व्हिडिओ शेअर करत लिहिले की, जर कोणत्याही आंदोलनामागे राजकीय हेतू नसेल, तर समाजातील इतर गंभीर घटनांवरही तितक्याच मोठ्या प्रमाणात आवाज उठायला हवा. तिने नसरापूर येथे घडलेल्या एका अल्पवयीन मुलीवरील अत्याचाराच्या प्रकरणाचा उल्लेख करत, त्या वेळी एवढ्या मोठ्या प्रमाणावर लोक रस्त्यावर का उतरले नाहीत, असा सवाल उपस्थित केला.

तिने आपल्या पोस्टमध्ये म्हटले की, काही घटनांमध्ये हजारो लोक आंदोलन करतात तर काही प्रकरणांमध्ये शांतता का असते, याचा विचार होणे गरजेचे आहे. प्रत्येक पीडितेला समान न्याय मिळाला पाहिजे आणि कोणत्याही घटनेकडे निवडकपणे पाहू नये असे मत तिने व्यक्त केले.

याशिवाय, समाजात द्वेष किंवा तेढ निर्माण करणाऱ्या भडकाऊ पोस्ट टाळण्याचे आवाहन करत, शांतता राखण्याचेही तिने नागरिकांना आवाहन केले. तसेच, माझ्या मताशी सहमत नसाल तर मला अनफॉलो करू शकता असेही तिने आपल्या पोस्टमध्ये म्हटलं आहे.

अनेक कलाकारांनी आंदोलनाला दिला पाठिंबा

दरम्यान, NEET पेपरफुटी प्रकरणातील विद्यार्थ्यांच्या मागण्यांना अनेक कलाकारांनी पाठिंबा दर्शवला आहे. रितेश देशमुख, प्रीती झिंटा, अरमान मलिक, सोनू सूद, स्वरा भास्कर आणि सोनाक्षी सिन्हा यांनीही सोशल मीडियावर विद्यार्थ्यांच्या आंदोलनाबाबत प्रतिक्रिया व्यक्त करत पारदर्शक चौकशी आणि विद्यार्थ्यांना न्याय मिळण्याची मागणी केली आहे.

अंकिता वालावलकरच्या पोस्टनंतर सोशल मीडियावर संमिश्र प्रतिक्रिया उमटत आहेत. काही नेटकऱ्यांनी तिच्या मताचे समर्थन केले असून, सर्वच गंभीर घटनांवर समान तीव्रतेने आवाज उठला पाहिजे असे मत व्यक्त केले. तर काहींनी विद्यार्थ्यांच्या आंदोलनाबाबत तिच्या भूमिकेवर टीका केली आहे.