‘अनुपमा’ फेम रुपाली गांगुलीचा भाजपात प्रवेश; युजर्स म्हणाले ‘आता करिअर संपलं’
'अनुपमा' या मालिकेतून घराघरात पोहोचलेली अभिनेत्री रुपाली गांगुलीने भाजपात प्रवेश केला आहे. दिल्लीतील भाजप मुख्यालयात तिने विनोद तावडेंच्या उपस्थितीत पक्षप्रवेश केला. रुपालीच्या या निर्णयावर नेटकऱ्यांकडून विविध प्रतिक्रिया येत आहेत.
‘साराभाई व्हर्सेस साराभाई’ आणि ‘अनुपमा’ यांसारख्या लोकप्रिय मालिकांमध्ये भूमिका साकारलेली अभिनेत्री रुपाली गांगुलीने भारतीय जनता पार्टीत प्रवेश केला आहे. लोकसभा निवडणुकीच्या पार्श्वभूमीवर इतर काही सेलिब्रिटींप्रमाणेच रुपालीनेही राजकीय क्षेत्रातील प्रवासाला सुरुवात केली आहे. रुपाली ही टेलिव्हिजन इंडस्ट्रीतील सर्वांत लोकप्रिय आणि यशस्वी अभिनेत्रींपैकी एक आहे. बुधवारी दिल्लीतल्या भाजप मुख्यालयात तिने विनोद तावडे यांच्या उपस्थितीत पक्षप्रवेश केला. तिचे काही फोटो आणि व्हिडीओ सोशल मीडियावर व्हायरल होत आहेत. पक्षप्रवेश केल्यानंतर रुपालीने राजकारणात येण्याचा निर्णय का घेतला आणि भाजप हा पक्ष का निवडला यामागचं कारण सांगितलं आहे.
माध्यमांशी बोलताना रुपाली म्हणाली, “एक नागरिक म्हणून आपण सर्वांनी यात सहभागी व्हायला हवं. महाकाल आणि माताराणीच्या आशीर्वादाने मी माझ्या कलेच्या माध्यमातून अनेकांना भेटते. मला त्यांची काळजी आहे. विकासाचं हे महायज्ञ पाहिल्यावर मलाही त्यात सहभागी होण्याची इच्छा निर्माण झाली. पंतप्रधान नरेंद्र मोदींनी दाखवलेल्या मार्गावर चालण्यासाठी आणि या देशाची सेवा करण्यासाठी मी या पक्षात प्रवेश केला आहे. अमित शाह यांच्या नेतृत्वात पुढे जाण्याची आणि असं काही काम करण्याची इच्छा आहे, ज्यामुळे त्यांना एकेदिवशी माझा अभिमान वाटेल. या प्रवासात मला तुमच्या आशीर्वादाची गरज आहे, जेणेकरून मी माझं काम योग्य आणि चांगल्या प्रकारे करू शकेन.”
रुपाली गांगुलीने भाजपात प्रवेश करताच नेटकऱ्यांनी त्यावर विविध प्रतिक्रिया देण्यास सुरुवात केली. ‘ही भविष्यातील स्मृती इराणीच आहे’, असं एकाने लिहिलं. तर ‘आता अनुपमा राजकारणातही ड्रामा करेल’, असं दुसऱ्या युजरने म्हटलंय. ‘करिअर संपला’, असंही नेटकऱ्यांनी लिहिलं आहे.
#WATCH | Actress Rupali Ganguly joins BJP at the party headquarters in Delhi. pic.twitter.com/CjRafwFd3W
— ANI (@ANI) May 1, 2024
रुपालीचे वडील प्रसिद्ध दिग्दर्शक आणि पटकथालेखक अनिल गांगुली आहेत. वडिलांची प्रकृती ठीक नसताना त्यांच्या उपचाराचा खर्च उचलण्यासाठी रुपालीने टेलिव्हिजन इंडस्ट्रीत काम करायला सुरुवात केली होती. स्टार प्लस वाहिनीवरील ‘अनुपमा’ ही तिची मालिका प्रचंड लोकप्रिय आहे. यामध्ये अभिनेत्री रुपाली गांगुली मुख्य अनुपमाची भूमिका साकारतेय. टीआरपीच्या यादीत ही मालिका नेहमीच अग्रस्थानी असते. लॉकडाऊनच्या काळात सुरू झालेल्या या मालिकेचा मोठा प्रेक्षकवर्ग आहे. या मालिकेमुळे रुपाली सर्वसामान्यांमध्येही ‘अनुपमा’ म्हणून ओळखली जाऊ लागली आहे.
