हे असं कोण बघणार? ‘धुरंधर 2’च्या ओटीटी रिलीजवर संतापली अभिनेत्री; प्रेक्षकही निराश

आदित्य धर दिग्दर्शित ‘धुरंधर : द रिव्हेंज’ हा ब्लॉकबस्टर चित्रपट ओटीटी प्लॅटफॉर्मवर कधी येणार, याची प्रतीक्षा जगभरातील प्रेक्षकांना होती. अखेर जूनच्या पहिल्याच आठवड्यात हा चित्रपट जियो हॉटस्टारवर स्ट्रीम झाला. ‘धुरंधर’चा पहिला भाग जरी नेटफ्लिक्सवर स्ट्रीम झाला असला तरी दुसऱ्या भागासाठी निर्मात्यांनी जियो हॉटस्टार या ओटीटी प्लॅटफॉर्मची निवड केली. मात्र यावर हा चित्रपट बघण्याचा अनुभव त्रासदायक असल्याची तक्रार अनेकांनी केली. रणवीरचा ‘धुरंधर 2’ हा चित्रपट ओटीटीवर पाहताना अनेक अडचणी आल्याने प्रेक्षक निराश झाले आहेत. अशातच ‘बिग बॉस’ फेम अभिनेत्री बंदगी कालरा हिनेसुद्धा सोशल मीडियावर पोस्ट लिहित तीव्र संताप व्यक्त केला.

रणवीर सिंहचा हा चित्रपट 5 जूनपासून जियो हॉटस्टारवर स्ट्रीम होत आहे. ओटीटी प्लॅटफॉर्मवर उपलब्ध असल्याने बंदगी कालरानेही हा चित्रपट पाहण्याचा विचार केला. मात्र चित्रपट पाहताना वारंवार येणाऱ्या जाहिरातींमुळे ती वैतागली. त्यामुळे हा चित्रपट जियो हॉटस्टारऐवजी नेटफ्लिक्सवर प्रदर्शित करायला हवा होता, असं मत तिने मांडलं आहे.

बंदगीने एक्स (ट्विटर) अकाऊंटवर लिहिलं, ‘धुरंधर : द रिव्हेंज हा चित्रपट या फालतू जियो हॉटस्टारवर नाही तर नेटफ्लिक्सवर प्रदर्शित करायला हवा होता, अशी माझी इच्छा आहे. 100 जाहिराती आणि खराब ऑडिओ असलेला हा चित्रपट कोण पाहू इच्छितो? या जाहिराती इतक्या लांब आहेत की तुम्ही कोणता चित्रपट किंवा दृश्य पाहत होता, हेच विसरून जाता. नेटफ्लिक्स कृपया हा चित्रपट प्रदर्शित करा.’

बंदगीची पोस्ट-

I wish #dhurandhar2‌ Revenge was released on @NetflixIndia and not on shitty @JioHotstar who the f wants to watch a movie with 100 ads, poor audio! I mean the ads are so f long that you forget which movie or scene you were watching! @netflix please get it!

— Bandgee Kallra (@BandgeeKallra) June 5, 2026

बंदगीने या चित्रपटातील रणवीरच्या अभिनयाचं मात्र कौतुक केलं. ‘रामलीला या चित्रपटात रणवीरला पाहिल्यापासून मी त्याची सर्वांत मोठी चाहती झाली आहे. तो असा एकमेव अभिनेता आहे, ज्याने इतक्या वेगवेगळ्या भूमिका साकारल्या आहेत. अत्यंत प्रामाणिकपणाने आणि सर्जनशीलतेनं त्याने ही भूमिका साकारली आहे. मी नेहमीच त्याची नंबर वन चाहती राहीन’, असं तिने पुढे लिहिलं आहे.

बंदगीची पोस्ट व्हायरल होत असून त्यावर नेटकऱ्यांनी विविध प्रतिक्रिया दिल्या आहेत. ‘कमी शुल्कामुळे काही लोक जाहिरात असलेलं सबस्क्रिप्शन घेतात. म्हणून असं होतं’, असं एकाने निदर्शनास आणून दिलं. तर चित्रपटादरम्यान येणाऱ्या असंख्य जाहिराती या लक्ष विचलित करणाऱ्या आणि मनोरंजनाचा अनुभव बिघडवणाऱ्या आहेत, असा युक्तिवाद इतरांनी केला.