‘मन्नत’ नाही सांभाळू शकला शाहरुख खान? कायद्याच्या कचाट्यात अडकला किंग खानचा बंगला, काय आहे प्रकरण
Shah Rukh Khan Mannat In Legal Issues: शाहरुख खान पुन्हा वादाच्या भोवऱ्यात, किंग खानचा आलिशान 'मन्नत' बंगला कायद्याच्या कचाट्यात... 'मन्नत' नाही सांभाळू शकला अभिनेता, काय आहे प्रकरण?
Shah Rukh Khan Mannat In Legal Issues: अभिनेता शाहरुख खान याचा आलिशान ‘मन्नत’ बंगला कोणत्या टूरिस्ट प्लेसपेक्षा कमी नाही. अभिनेत्याचे चाहते कायम त्याच्या बंगल्या बाहेर उभे राहून फोटो आणि व्हिडीओ काढत असतात. एवढंच नाही तर अभिनेत्याची एक झलक पाहण्यासाठी चाहत्यांची गर्दी शाहरुखच्या बंगल्याबाहेर उभी असते. पण आता शाहरुख खान याचा ‘मन्नत’ बंगला कायद्याच्या कचाट्यात अडकला आहे.
शाहरुख खान आणि गौरी खान यांनी त्यांच्या घराला आणखी आलिशान बनवण्यासाठी नूतनीकरण करण्याचा निर्णय घेतला आहे. मात्र त्यापूर्वीच त्यांचं घर कायदेशीर अडचणीत अडकलं आहे. शाहरुख खानचा बंगला मन्नत ग्रेड III हेरिटेज स्ट्रक्चरच्या यादीत समाविष्ट आहे. अशा परिस्थितीत या बंगल्यात कोणत्याही प्रकारचे संरचनात्मक बदल करण्यासाठी सुपरस्टारला प्राधिकरणाची परवानगी घ्यावी लागेल.
View this post on Instagram
बार अँड बेंचच्या म्हणण्यानुसार, सामाजिक कार्यकर्ते संतोष दौंडकर यांनी एनजीटीला पत्र लिहून शाहरुख खान आणि महाराष्ट्र कोस्टल झोन मॅनेजमेंट अथॉरिटीने मन्नतमधील नूतनीकरणासाठी कोस्टल रेग्युलेशन झोनच्या परवानगीचे उल्लंघन केल्याचा आरोप केला आहे.
किंग खान याच्यावर आरोप केल्यानंतर एनजीटीने संतोष दौंडकर यांना शाहरुख खानवरील आरोपांबाबत पुरावे सादर करण्याचे निर्देश न्यायालयाने दिले आहेत. याप्रकरणी पुढील सुनावनी आका 23 एप्रिल रोजी होणार आहे.
दरम्यान, न्यायिक सदस्य दिनेश कुमार सिंग आणि तज्ज्ञ सदस्य विजय कुलकर्णी यांच्या समितीने सांगितलं- ‘प्रकल्प प्रस्तावक किंवा MCZMA द्वारे योग्य प्रक्रियेचे उल्लंघन झाल्यास, अपीलकर्त्याला चार आठवड्यांच्या आत योग्य पुराव्यासह ते सिद्ध करावे लागेल, असे न केल्यास या न्यायाधिकरणाच्या आदेशाचे पालन न केल्याबद्दल प्रवेशाच्या टप्प्यावरच अपील फेटाळण्याशिवाय आमच्याकडे पर्याय राहणार नाही. त्यामुळे याप्रकरणी पुढे काय होणार पाहणं महत्त्वाचं ठरणार आहे.
भाड्याच्या घरात शिफ्ट होणार शाहरुख खान…
सांगायचं झालं तर, शाहरुख खान त्याच्या मन्नत या सहा मजली बंगल्यात आणखी दोन मजले वाढवण्याचा विचार करत आहे. मिळालेल्या माहितीनुसार, ‘मन्नत’ बंगल्याच्या नूतनीकरणासाठी किंग खान जॅकी भगनानीच्या अपार्टमेंटमध्ये भाड्याने शिफ्ट होणार असल्याच्या चर्चा रंगल्या आहेत.
