रणवीर सिंहवर इंडस्ट्रीची बंदी… अभिनेत्रीने थेट FWICE ला ललकारले; म्हणाली, हिंमत असेल तर सलमानला…
रणवीर सिंहला 'डॉन 3' मधून बाहेर पडणं महागात पडलं आहे; FWICE ने त्याच्यावर बंदी घातली. यावर राखी सावंतने रणवीरला पाठिंबा देत सिने संस्थेला थेट आव्हान दिले आहे. तिने सलमान खानवर बंदी घालून दाखवण्याचं आव्हान दिलं, तसेच फरहान अख्तर रणवीरच्या नावाचा वापर करून प्रसिद्धी मिळवत असल्याचा आरोपही केला.
बॉलिवूड सुपरस्टार रणवीर सिंहला डॉन-3 मधून बाहेर पडणं चांगलंच महागात पडलं आहे. रणवीरच्या या निर्णयामुळे दिग्दर्शकाला कोट्यवधीचं नुकसान झाल्याने फेडरेशन ऑफ वेस्टर्न इंडिया सिने एम्प्लॉइजने रणवीरवर बंदी घातली आहे. त्याच्यासोबत कुणीच काम करायचं नाही, असं फर्मानच या संस्थेने काढलं आहे. त्यामुळे रणवीर सिंहची चांगलीच गोची झाली आहे. एफडब्ल्यूआयसीईच्या या निर्णयावर बॉलिवूडमधून फारशा प्रतिक्रिया येताना दिसत नाहीये. पण अभिनेत्री राखी सावंतने रणवीर सिंहला फुल्ल सपोर्ट केला आहे. तिने थेट सिने संस्थेलाच ललकारले आहे.
राखी सावंतने या प्रकरणावर प्रतिक्रिया व्यक्त केली आहे. रणवीरच्या यशावर या संस्थेतील काही लोक जळतात, असा आरोपच तिने केला आहे. तिने दिग्दर्शक फरहाण अख्तरवरही तोंडसुख घेतलं आहे. रणवीरच्या नावाचा वापर करून फरहान प्रसिद्धी मिळवू पाहत असल्याची टीका राखी सावंतने केली आहे.
रणवीरवर जळतात
मुंबईत पैपराजींसोबत बोलताना राखी सावंतने एकालाही सोडलं नाही. प्रचंड रागात आणि तावातावात ती बोलत होती. रणवीरला टार्गेट केलं जात असल्याबद्दल तिने नाराजीही व्यक्त केली. ज्या व्यक्तीने आपल्या मेहनतीच्या बळावर आपली ओळख निर्माण केली आहे. त्याला अशा पद्धतीने त्रास देणं योग्य नाही. मी संस्थेच्या या निर्णयाचा कठोर शब्दात निषेध नोंदवते. हे सर्व होताना पाहून मला प्रचंड राग येत आहे. रणवीर आज एक सुपरस्टार आहे. त्यामुळेच त्याच्यावर प्रत्येकजण जळत असल्याचं राखी म्हणाली. दीपिका पादुकोण आणि रणवीर सिंहने कोणत्याही गॉडफादर शिवाय बॉलिवूडमध्ये वरचं स्थान मिळवलं आहे, असंही तिने सांगितलं.
सलमानवर बंदी घालून दाखवा
राखीने या वादात सलमान खानचंही नाव घेतलं. मी या संस्थेला आव्हान देते, या लोकांमध्ये हिंमत असेल तर त्यांनी सलमान खानला बॅन करून दाखवावं. सलमान भाईला टच करून तर दाखवा, तो एकटाच सर्वांची बँड वाजवल्याशिवाय राहणार नाही, असंही राखी म्हणाली.
फरहानवर आरोप
यावेळी राखीने फरहान अख्तरवर आरोप लावले. फरहान अख्तर त्याच्या सिनेमाने कधीच सुपरहिट झाले नाही. ते चर्चेतही नव्हते. आता रणवीर सिंहचं नाव घेऊन ते स्वस्तातील प्रसिद्धी मिळवत आहेत. रणवीरचं नाव घेतल्यानेच फरहानच्या नावाची चर्चा होत आहे, असा टोलाही तिने लगावला.
