Bigg Boss 17 : ‘दररोज पत्नीचा अपमान करणं..’; अंकिता लोखंडेच्या पतीवर भडकली अभिनेत्री

मुंबई : 28 ऑक्टोबर 2023 | अभिनेत्री अंकिता लोखंडे आणि तिचा पती विकी जैन यांची जोडी बिग बॉसच्या घरात आणि घराबाहेर सतत चर्चेत आहे. अंकिता आणि विकी ही एकदम परफेक्ट जोडी आहे, असंच त्यांच्या सोशल मीडियावरून चाहत्यांना वाटायचं. मात्र त्यांच्या नात्याची एक वेगळीच बाजू प्रेक्षकांना बिग बॉसद्वारे पहायला मिळतेय. विकी सतत अंकिताचा इतरांसमोर अपमान करताना दिसतोय. या दोघांची दररोज भांडणं होत आहेत. यावरून ‘वीकेंड का वार’ एपिसोडमध्ये सलमान खान विकीची शाळा घेणारच आहे. याशिवाय नेटकऱ्यांनीही त्याच्यावर जोरदार टीका करण्यास सुरुवात केली आहे. आता टेलिव्हिजनवरील प्रसिद्ध अभिनेत्री देवोलीना भट्टाचार्जी हिनेसुद्धा विकीवर निशाणा साधला आहे. देवोलीनाची पोस्ट सोशल मीडियावर चर्चेत आली आहे.

बिग बॉसच्या घरात अंकिता आणि विकी अनेक विषयांवरून एकमेकांसोबत भांडताना दिसले. मात्र गेल्या काही दिवसांपासून विकी सतत अंकिताचा अपमान करताना दिसतोय. गुरुवारी पुन्हा एकदा या दोघांमध्ये वाद झाला आणि यावेळी विकी थेट म्हणाला, “अंकिता मला तुझी लाज वाटते.” विकीच्या तोंडून हे शब्द ऐकून अंकिताचे चाहतेसुद्धा सोशल मीडियावर भडकले. इतकंच नव्हे तर विकी तिला सुनावतो, “आयुष्यात तू मला काहीच देऊ शकली नाहीस. तर किमान मानसिक शांती तरी दे.” गुरुवारच्या या एपिसोडनंतर नेटकरी विकीवर चांगलेच भडकले आहेत.

देवोलीनाचं ट्विट

Husband/Wife ka mann mutau chalta rehta hai. But humiliating , insulting your wife every damn day is not at all entertaining nor it cant be a part of game. #BB17

— Devoleena Bhattacharjee (@Devoleena_23) October 27, 2023

‘गोपी बहू’ ऊर्फ देवोलीना हिने एक्सवर (ट्विटर) पोस्ट लिहित विकीवर निशाणा साधला आहे. ‘पती-पत्नीमध्ये मतभेद होतच असतात. परंतु दररोज पत्नीचा अपमान करणे, तिला वाईट वागणूक देणं हे अजिबात मनोरंजक नाही आणि हा खेळाचा भागसुद्धा होऊ शकत नाही’, असं तिने म्हटलंय. देवोलीनाच्या या ट्विटवर कमेंट करत अनेकांनी तिची बाजू घेतली आहे. ‘विकीचं अंकितासोबतचं वागणं खरंच अपमानजनक आहे’, असं एकाने लिहिलं. तर ‘कधी कधी भांडणं होऊ शकतात. पण दररोज हा अंकिताला का सुनावतोय’, असा सवाल दुसऱ्या युजरने केला.