Sofia Hayat: उपवासामुळे अभिनेत्रीची तब्येत बिघडली; बेशुद्ध झाल्याने रुग्णालयात केलं दाखल
सोफियाने 2016 मध्ये अध्यात्मचा मार्ग स्वीकारला. गेल्या काही दिवसांपासून ती शरीर शुद्ध करण्यासाठी उपवास (Fasting) करत होती. मात्र उपवासामुळे तिच्या शरीरात मिठाची (body salts) तीव्र कमतरता निर्माण झाली होती. ज्यामुळे ती बेशुद्ध झाली.
‘बिग बॉस 7’मध्ये हजेरी लावल्यानंतर प्रकाशझोतात आलेली अभिनेत्री सोफिया हयातला (Sofia Hayat) युकेमध्ये रुग्णालयात दाखल करण्यात आलं आहे. चक्कर येऊन बेशुद्ध पडल्याने तिला रुग्णालयात दाखल करण्यात आलं. सोफियाने 2016 मध्ये अध्यात्मचा मार्ग स्वीकारला. गेल्या काही दिवसांपासून ती शरीर शुद्ध करण्यासाठी उपवास (Fasting) करत होती. मात्र उपवासामुळे तिच्या शरीरात मिठाची (body salts) तीव्र कमतरता निर्माण झाली होती. ज्यामुळे ती बेशुद्ध झाली आणि त्यानंतर तिला रुग्णालयात दाखल करावं लागलं. सोफियाची प्रकृती सध्या ठीक आहे.
एका मीडिया पोर्टलशी बोलताना तिने सांगितलं की, ‘मी उपवासाच्या माध्यमातून शरीर शुद्ध करण्याचा प्रयत्न करत होते. यासाठी मी अॅनेमा केला होता. पण या प्रक्रियेदरम्यान माझ्या शरीरातून बरंच मीठ आणि इलेक्ट्रोलाइट्स बाहेर पडले. त्यांची पातळी इतकी खालावली गेली की माझ्या जिवाला धोका निर्माण झाला. मी नर्सला मिठाची पाच पाकिटं देण्यास सांगितलं आणि त्यामुळे मी वाचले.”
इन्स्टा पोस्ट
View this post on Instagram
सोफिया पुढे म्हणाली की, “यामुळे मला रुग्णालयात दाखल करण्यात आलं. माझं हृदय जोरात धडधडत होतं, मी थरथर कापत होते. अखेर मला उपवास सोडावा लागला. माझ्या आरोग्यासाठी मला जेवावं लागलं. माझ्या शरीराल सध्या उपवास सहन होऊ शकणार नाही. यापूर्वी मी 2014 मध्येसुद्धा असं केलं होतं. पण तेव्हा मला काहीच झालं नव्हतं. आता माझी तब्येत खूपच बिघडली.” सोफियाला लवकरच रुग्णालयातून डिस्चार्ज देण्यात येणार आहे.
उपवास कशासाठी केला असा प्रश्न विचारला असता तिने सांगितलं, “माझ्या पूर्वीच्या आयुष्याचा शोध घेण्यासाठी, माझ्या आत्म्याशी संपर्क साधण्यासाठी आणि त्याच्याशी बोलण्यासाठी मी उपवास करत आहे. मी यापूर्वीही असा सराव केला आहे. पण काही दिवसांनी माझी अन्न खाण्याची किंवा पाणी पिण्याची इच्छा आपोआप कमी होते. पण यावेळी मला वेदना होत होत्या. अध्यात्मात एक चमत्कार आहे, ज्यामुळे मी आता बरी होत आहे. माझ्यावर देवाची कृपा आहे.”
