उर्मिला सॉफ्ट पॉर्न, तिला तिकीट मिळू शकतं तर… कंगनाचं ते वादग्रस्त विधान व्हायरल; कारण काय?

बॉलिवूडची प्रसिद्ध अभिनेत्री कंगना रनौत हिला हिमाचल प्रदेशमधील मंडी लोकसभा मतदारसंघातून भाजपाने उमेदवारी जाहीर केली आहे. आता कंगना तिच्या राजकारणाच्या प्रवासाला सुरुवात करत आहे. अभिनेत्रीला उमेदवारी जाहीर झाल्यामुळे कंगनाच्या बाबतीत अनेक जुने मुद्दे नव्याने समोर येत आहेत. कायम वादाचा मुकूट स्वतःच्या डोक्यावर मिरवणाऱ्या कंगनाने अभिनेत्री उर्मिला मातोंडकर यांचा उल्लेख ‘सॉफ्ट पॉर्न स्टार’ म्हणून केला होता. ज्यामुळे सर्वत्र खळबळ माजली होती.

कंगना रनौत 2020 मध्ये म्हणाली होती, ‘मी उर्मिला मातोंडकर हिची एक अपमानजनक मुलाखत पाहिली होती. ज्याप्रकारे ती माझ्याबद्दल ती स्वतःचं मत मांडत होती, ज्याप्रकारे ती माझ्याबद्दल बोलत होती… वेग-वेगळे भाव तिच्या चेहऱ्यावर मला दिसत होते…. माझ्या संघर्षावर खिल्ली उडवत होती…. भाजपचं तिकिट मिळवण्यासाठी मी कशाप्रकारे प्रयत्न करतेय यावरुन माझ्यावर निशाणा साधत होती…’

‘भाजपचं तिकिट मिळवणं माझ्यासाठी कठिण नाही… उर्मिला सॉफ्ट पॉर्न स्टार आहे… प्रत्येकाला माहिती आहे, ती तिच्या अभिनयामुळे नाही तर, कोणत्या गोष्टीमुळे प्रसिद्ध आहे? सॉफ्ट पॉर्न करण्यासाठीच ना… जर तिला तिकिट मिळू शकतं, तर मला का नाही?’ असं म्हणत कंगनाने उर्मिलावर निशाणा साधला होता.

उर्मिला मातोंडकर हिच्याबद्दल सांगायचं झालं तर, अभिनेत्रीने 2019 मध्ये मुंबई – उत्तर लोकसभा मतदार संघातून निवडणूक लढवली होती. पण कालांतराने अभिनेत्रीने काँग्रेस पक्षाचा निरोप घेत, शिवसेना पक्षात प्रवेश केला. तेव्हा राजकारणात प्रवेश केल्यामुळे उर्मिला प्रसिद्धी झोतात आल्या होत्या. आता उर्मिला अभिनयापासून दूर असल्या तरी कायम कोणत्या न कोणत्या कारणामुळे चर्चेत असतात.

कंगना रनौतची राजकारणात एन्ट्री

कंगना रनौत हिने स्वतःच्या जिद्दीवर बॉलिवूडमध्ये स्वतःचं स्थान पक्क केलं आहे. गेल्या अनेक वर्षांपासून अभिनेत्री बॉलिवूडमध्ये सक्रिय असते. बॉलिवूडमधील घराणेशाही,  गटबाजीवर देखील अभिनेत्री कायम निशाणा साधत असते. बॉलिवूडच्या प्रसिद्ध सेलिब्रिटींवर निशाणासाधत कंगना वादग्रस्त वक्तव्य करत असते. ज्यामुळे अभिनेत्रीला अडचणींचा देखील सामना करावा लागतो.

कंगना फक्त बॉलिवूड नाहीतर, राजकारणी मंडळींवर देखील वादग्रस्त वक्तव्य करत असते. नेते देखील अभिनेत्रीवर पलटवार करताना दिसतात. अशात आता कंगना निवडणूक लढवणार आहे. त्यामुळे बॉलिवूडनंतर अभिनेत्रीचं राजकीय करियर कसं असेल पाहणं महत्त्वाचं ठरणार आहे.