एवढी मेहनत फुकट..; ‘क्रांतिज्योती विद्यालय’च्या प्रॉडक्शनने तंबी देताच शाळांवर नेटकरीही चिडले

हेमंत ढोमे दिग्दर्शित ‘क्रांतिज्योती विद्यालय मराठी माध्यम’ या चित्रपटाला प्रेक्षकांकडून दमदार प्रतिसाद मिळतोय. बॉक्स ऑफिसवर या चित्रपटाने 20 कोटी रुपयांपेक्षा अधिक गल्ला जमवला आहे. एकीकडे थिएटरमध्ये या चित्रपटाचे शोज हाऊसफुल असताना दुसरीकडे काही शाळांमध्ये या अवैध प्रतींचा वापर करून विद्यार्थ्यांना शोज दाखवले जात आहेत. हा एक प्रकारे पायरसीचाच प्रकार असल्याने यासंदर्भात आता ‘क्रांतिज्योती विद्यालय’च्या टीमने तंबी दिली आहे. संबंधित संस्था किंवा व्यक्तींवर कायदेशीर कारवाई करणार असल्याचा इशाराही टीमने दिला आहे. यानंतर नेटकऱ्यांनीही संंबंधित लोकांविरुद्ध तीव्र संताप व्यक्त केला आहे.

प्रॉडक्शन टीमची पोस्ट-

‘सर्व शाळांसाठी कायदेशीर सूचना.. चलचित्र मंडळी, ही निर्मिती संस्था ‘क्रांतिज्योती विद्यालय मराठी माध्यम’ या चित्रपटाचं एकमेव कॉपीराइट धारक आहे. सदर चित्रपट सध्या चित्रपटगृहांमध्ये यशस्वीपणे प्रदर्शित झाला आहे. परंतु आमच्या निदर्शनास आलं आहे की काही व्यक्ती आणि संस्था काही शाळांमध्ये कोणतीही अधिकृत परवानगी न घेता अवैध प्रतींचा वापर करून शाळेच्या आवारात चित्रपटाचा खेळ आयोजित करत आहेत. कृपया नोंद घ्यावी की, कोणत्याही सार्वजनिक ठिकाणी अथवा शैक्षणिक संस्थांमध्ये सदर चित्रपटाचे खेळ आयोजित करण्यासाठी आम्ही कोणालाही अधिकृत परवानगी दिलेली नाही. सदर चित्रपटाचे असे कोणतेही बेकायदेशीर प्रदर्शिन करण्याचा प्रयत्न करणाऱ्या कोणत्याही संस्था/ व्यक्तींवर कॉपीराइट कायदा, 1957, सिनेमॅटोग्राफ (दुरुस्ती) कायदा, 2023 तसंच माहिती तंत्रज्ञान कायदा, 2000 अंतर्गत कठोर कायदेशीर कारवाई करण्यात येईल,’ असा इशारा प्रॉडक्शन टीमने दिला आहे.

View this post on Instagram

A post shared by Chalchitra Mandalee (@chalchitramandalee)

या पोस्टमध्ये त्यांनी पुढे म्हटलंय, ‘ज्या कोणत्याही संस्था/ व्यक्तींना सदर चित्रपटाचे कायदेशीर आणि अधिकृत प्रदर्शन आयोजित करायचे असल्यास, त्यांनी आमच्याशी थेट संपर्क साधावा. लवकरच ‘मराठी शाळा आठवडा’ या आमच्या आगामी सवलत दराच्या योजनेची अधिकृत सूचना जाहीर होणार आहे. त्यामुळे सगळ्यांनी नियमांचं पालन करून सहकार्य करावं ही नम्र विनंती.’

या पोस्टवर नेटकऱ्यांनी विविध प्रतिक्रिया दिल्या आहेत. ‘विषय शाळेचा असला तरी चोरुन चित्रपट दाखवणं गुन्हा आहे आणि चित्रपटच्या टीमची एवढी मेहनत अशी फुकट कशी काय दाखवत आहेत,’ असं एकाने लिहिलंय. तर ‘चित्रपटाचा मूळ उद्देश मराठी शाळा वाचवण्याचा आणि टिकवण्याचा आहे आणि मराठीचं महत्त्व सांगण्याचा आहे. शाळा महाविद्यालयांचा हेतू चांगला आहे पण चित्रपट दाखवण्याचा प्रकार कायदेशीररित्या चुकीचा आहे. हा चित्रपट काय पण कुठल्याही चित्रपटाची पायरसी करणं हा खूप मोठा गुन्हा आहे. कदाचित शाळा महाविद्यालयांना या गोष्टीचा महत्त्व माहिती नसावं म्हणून त्यांच्यातून चुकून हे घडत असेल,’ असं दुसऱ्या युजरने म्हटलंय.