Nana Patekar: परवा तासभर गप्पा मारल्या अन्..; नाना पाटेकरांच्या निधनाने मानलेली बहीण भावूक

Nana Patekar: ज्येष्ठ अभिनेते नाना पाटेकर यांच्या निधनाने मनोरंजनसृष्टीला मोठा धक्का बसला आहे. वयाच्या 75व्या वर्षी कार्डिअॅक अरेस्टने त्यांचं निधन झालं. नानांच्या निधनानंतर त्यांच्या जवळच्या व्यक्ती, मित्र आणि सहकलाकारांकडून आठवणींना उजाळा दिला जात आहे. नाना पाटेकर यांची मानलेली बहीण संपदा नाईक यांनी टीव्ही9 मराठीशी बोलताना नानांसोबतच्या शेवटच्या भेटीच्या आठवणी सांगितल्या. अवघ्या दोन दिवसांपूर्वी नानांना भेटले होते, तेव्हा त्यांना कोणताही त्रास जाणवला नव्हता, असं त्यांनी सांगितलं. संपदा नाईक यांनी सांगितलं की, सकाळी साधारण सात वाजता त्यांनी सहज फेसबुक अकाऊंट उघडलं आणि नाना पाटेकर यांच्या निधनाची बातमी पाहिली. ही बातमी पाहून त्यांना मोठा धक्का बसला. वृत्त खरं आहे की नाही, याची खात्री करण्यासाठी त्यांनी तातडीने नानांचा मानलेला मुलगा अमेय याला मेसेज केला. “हे खरं आहे का?” असा प्रश्न त्यांनी त्याला विचारला.

नानांच्या निधनाची बातमी त्यांच्यासाठी इतकी अनपेक्षित होती, कारण अवघ्या दोन दिवसांपूर्वीच त्यांची नानांसोबत भेट झाली होती. संपदा नाईक नानांच्या घरी गेल्या होत्या. त्यावेळी दोघांनी जवळपास तासभर मनमोकळ्या गप्पा मारल्या. विशेष म्हणजे, त्या भेटीत नानांनी त्यांच्या मुलाला सोबत घेऊन येण्यास सांगितलं होतं. “मुलाला घेऊन ये, मला त्याला भेटायचं आहे,” असं नाना म्हणाले होते. त्यामुळे संपदा नाईक आपल्या मुलाला घेऊन त्यांना भेटण्यासाठी गेल्या होत्या.

नाना पाटेकर सम्राट क्लब इंटरनॅशनलच्या कार्यक्रमासाठी गोव्यात आले होते. या कार्यक्रमाच्या निमित्ताने त्यांचं गोव्यात येणं झालं होतं. संपदा नाईक यांनी सांगितलं की, नानांचं गोव्यात स्वतःचं घर आहे आणि ते अधूनमधून इथे येत असत. गोव्याबद्दल त्यांना विशेष आपुलकी होती. त्यामुळे गोव्यात आल्यानंतर ते आपल्या परिचितांशी आणि मित्रमंडळींशी आवर्जून संपर्क साधत असत.

इतकंच नाही, तर दोन दिवसांपूर्वी त्यांचं नानांशी फोनवरही बोलणं झालं होतं. गोव्यातील नवीन प्रोजेक्ट्सबाबत नाना त्यांच्याकडे विचारणा करत असत. त्यामुळे त्यांच्या अचानक जाण्याची बातमी ऐकून विश्वासच बसत नसल्याचं संपदा नाईक यांनी म्हटलंय. शेवटच्या भेटीची आठवण सांगताना त्या म्हणाल्या की, नानांना कोणताही त्रास होत असल्याचं त्यांना अजिबात जाणवलं नव्हतं. ते अगदी व्यवस्थित बोलत होते. त्यांच्या बोलण्यात किंवा वागण्यातून प्रकृतीविषयी काही गंभीर संकेत मिळाले नव्हते. त्यामुळे दोन दिवसांपूर्वी भेटलेली व्यक्ती आता आपल्यात नाही, ही गोष्ट त्यांच्या मनाला अधिक चटका लावणारी ठरली आहे.