Oppenheimer | ‘ओपनहायमर’मधील भगवद् गीतेच्या सीनवरून मोठा वाद; चित्रपट पाहिल्यानंतर भडकले नेटकरी

मुंबई | 21 जुलै 2023 : जगप्रसिद्ध दिग्दर्शक ख्रिस्तोफर नोलनचा बहुप्रतिक्षित आणि बहुचर्चित ‘ओपनहायमर’ हा चित्रपट नुकताच प्रदर्शित झाला आहे. हा चित्रपट पाहिल्यानंतर सोशल मीडियावर त्यावरून विविध प्रतिक्रियांचा पाऊस पडतोय. सिलियन मर्फीने यामध्ये मुख्य भूमिका साकारली आहे. यातील कलाकारांचं अभिनय, दिग्दर्शन आणि धमाकेदार सीन्स प्रेक्षकांना खूप आवडत आहेत. मात्र ‘ओपनहायमर’मधील एक सीन सध्या सोशल मीडियावर जोरदार चर्चेत आला आहे. या सीनमध्ये भगवद् गीतेच्या वापरावरून नेटकरी भडकले आहेत.

ओपनहायमरमध्ये अभिनेता आणि त्याच्या प्रेयसीचा एक इंटिमेट सीन दाखवला आहे. यावेळी त्याची प्रेयसी अभिनेत्याला भगवद् गीतेतील एक श्लोक वाचण्यास सांगते. त्यावरून आता नेटकऱ्यांनी संताप व्यक्त केला आहे. ‘आताच ओपनहायमर पाहून आलो. यातील एका सीनमध्ये नग्न महिलेच्या हातात भगवद् गीता असते आणि ती ओपनहायमरला श्लोक वाचण्यास सांगते. मी अजूनही धक्क्यात आहे. अशा सीनमध्ये धार्मिक पुस्तक वापरण्याची काय गरज होती’, असा सवाल एकाने केला. तर ‘तुम्ही सनातनी असाल आणि भगवद् गीतेच्या संदर्भासाठी ओपनहायरम हा चित्रपट पाहायला जात असाल तर नका जाऊ’, असा सल्ला दुसऱ्या युजरने दिला.

If you’re a Sanatani and you want to watch Oppenheimer because of the Bhagwat Geeta reference,

Please Don’t.#OppenheimerMovie #Oppenheimer

— Nakshatra (@Nukshatra) July 20, 2023

Just came out after watching #openheimer. They had a scene where a naked woman is holding the Bhagavat Geeta asking Openheimer to read the verse. I am shocked. What was the need to use my religious book in such a scene?

— The Thinking Hat ?? (@ThinkinHashtag) July 21, 2023

कलाकारांच्या इंटिमेट सीनदरम्यान भगवद् गीतेच्या वापराची काहीच गरज नव्हती, असं मत अनेकांनी मांडलं. या सीनवरून सनातन धर्मीयांच्या भावना दुखावल्या गेल्या आहेत. त्यामुळेच चित्रपटावरून वाद सुरू आहे. मात्र असेही काही नेटकरी आहेत, ज्यांना यात काहीच चुकीचं वाटत नाही. ‘चित्रपटात भगवद् गीतेचा सीन आहे पण त्यात कोणत्याही धर्माचा किंवा धार्मिक ग्रंथाचा अपमान करण्याचा हेतू होता असं मला वाटत नाही. तुम्ही संपूर्ण चित्रपट पाहिला तर तुम्हाला नक्कीच कारण समजेल’, असं एका युजरने म्हटलंय.

The geeta scene is there but I don’t think so there was any intention to mock religion or its book. You will understand once you watch the movie. #Oppenheimer

— Indrajith Bandara (@IndrajithTweets) July 21, 2023

‘ओपनहायमर’ या हॉलिवूड चित्रपटाची क्रेझ भारतातही खूप आहे. ख्रिस्तोफर नोलनच्या या चित्रपटाला आताच्या काळातील सर्वांत मोठ्या चित्रपटांपैकी एक म्हणून ओळखलं जात आहे. 1930 आणि 40 च्या दशकात अणुबॉम्ब तयार करण्याचा अमेरिकेच्या गुप्त ‘मॅनहॅटन प्रोजेक्ट’वर या चित्रपटाची कथा आधारित आहे. शास्त्रज्ञ रॉबर्ट जे ओपनहायमर यांच्या नजरेतून ही कथा सांगितली जात आहे. ते अणुबॉम्बचे जनक म्हणून ओळखले जातात.

ख्रिस्तोफर नोलन दिग्दर्शित या चित्रपटात सिलियन मर्फी मुख्य भूमिकेत आहे. त्याच्यासोबतच एमिली ब्लंट, मॅट डॅमन, रॉबर्ट डाऊनी ज्युनियर, फ्लॉरेन्स पग, जोश हार्टनेस, केसी अफ्लेक, रामी मालेक आणि केनेथ ब्रनाघ यांच्याही भूमिका आहेत.