123 मिनिटांचा सायको थ्रिलर सिनेमा, चकीत करणारा क्लायमॅक्स, प्रत्येक भूमिकेवर उपस्थित होईल शंका

जर तुम्हाला उत्तम सायकोलॉजिकल थ्रिलर चित्रपट पहायचा असेल आणि ओटीटीवर काहीतरी नवीन कंटेंट तुम्ही शोधत असाल तर 2 तास 3 मिनिटांचा हा चित्रपट ‘मस्ट वॉच’च्या यादीत आवर्जून समाविष्ट करा. रोमँटिक, हॉरर किंवा कॉमेडी याशिवाय जर तुम्हाला दुसरं काहीतरी वेगळं पहायची इच्छा असेल तरीही तुम्ही या सायको थ्रिलरची निवड करू शकता. 2025 मध्ये प्रदर्शित झालेल्या या चित्रपटाची कथा 2021 मध्ये केरळमध्ये घडलेल्या एका सत्य घटनेवर आधारित आहे. हा चित्रपट मूळ तमिळ भाषेत असला तर ओटीटीवर तो विविध भाषांमध्ये उपलब्ध आहे. या सायकोलॉजिकल क्राइम चित्रपटात गोमती शंकर मुख्य भूमिकेत आहे आणि त्याचं दिग्दर्शक मिथुनने केलं आहे.

ओटीटी प्लॅटफॉर्मवर दर आठवड्याला अनेक चित्रपट आणि वेब सीरिज प्रेक्षकांच्या भेटीला येतात. परंतु त्यापैकी काही उत्तम चित्रपट आणि सीरिजच प्रेक्षकांच्या पसंतीस उतरतात आणि ट्रेंडिग यादीत स्थान मिळवू शकतात. या लेखात आम्ही ज्या सायकोलॉजिकल क्राइम थ्रिलरबद्दल बोलत आहोत, त्याचं नाव ‘स्टीफन’ असं आहे. या चित्रपटाची कथा सुरुवातीपासून शेवटपर्यंत इतकी दमदार आहे की तुम्ही एकदा तो पाहायला सुरू केला तर पूर्ण चित्रपट संपल्याशिवाय जागेवरून उठू शकणार नाही. यामधील ट्विस्ट आणि सीन्स पाहून तुम्ही थक्क व्हाल. ‘स्टीफन’चा क्लायमॅक्स तर सर्वांत जबरदस्त आहे.

चित्रपटाची कथा

स्टीफन ही एका शांत मुलाची कथा आहे, ज्याच्या हास्यामागे बालपणीचे आघात दडलेले असतात. जेव्हा परिसरात एकापाठोपाठ एक खून होऊ लागतात, तेव्हा एक पोलीस अधिकारी आणि एक चिकित्सक मानसशास्त्रज्ञ स्टीफनला गुन्हेगार बनवणारे छुपे रहस्य उघड करण्याच्यासाठी त्याच्या भूतकाळाचा शोध घेतात. त्यांच्या या शोधात दडपलेल्या वेदना, खरी ओळक आणि दीर्घकाळ जपलेल्या रहस्यांचं एक जाळं उलगडतं, जे त्याच्या प्रत्येक निर्णयाशी निगडीत असतं. स्टीफनच्या अंध:कारमय भूतकाळात खोलवर शिरून हा चित्रपट एक अत्यंत अस्वस्थ करणारं जग समोर आणतो.

हा चित्रपट 5 डिसेंबर 2025 रोजी नेटफ्लिक्स या ओटीटी प्लॅटफॉर्मवर प्रेक्षकांच्या भेटीला आला होता. तमिळ, हिंदी, मल्याळम, तेलुगू आणि इंग्रजी अशा विविध भाषांमध्ये तो ओटीटीवर उपलब्ध आहे. या चित्रपटात गोमती शंकरसोबतच मायकल थंगदुराई, स्मृती व्यंकट यांच्याही महत्त्वपूर्ण भूमिका आहेत.