‘व्हॅलेंटाईन डे’च्या दिवशी जोडीदाराला दाखवा हा चित्रपट, Love स्टोरी पाहून डोळ्यात येईल पाणी
जर तुम्हाला देखील या व्हॅलेंटाईन वीकला दर्दभरी लव स्टोरी बघायची असेल तर हा चित्रपट तुमच्यासाठी ठरेल खास. जो बघताच आजही प्रेक्षकांच्या डोळ्यात येते पाणी.
valentine’s day special : व्हॅलेंटाईन वीक म्हटलं की अनेकदा आनंदी शेवट, गोड प्रेमकथा आणि रोमँटिक दृश्यांचीच अपेक्षा असते. पण जर तुम्हाला याच आठवड्यात काही वेगळं, हृदय पिळवटून टाकणारं आणि प्रेमाच्या वेड्या टोकापर्यंत घेऊन जाणारं काही बघायचं असेल तर 2 तास 20 मिनिटांची ‘रांझणा’ हा चित्रपट तुम्ही पाहू शकता. आनंद एल. राय यांच्या दिग्दर्शनाखाली तयार झालेला हा चित्रपट आजही भारतीय सिनेमातील सर्वात प्रभावी आणि वेदनादायी प्रेमकथांपैकी एक मानला जातो.
ही कथा सुरू होते बनारसच्या अरुंद गल्ल्यांमधून जिथे ब्राह्मण मुलगा कुंदन (धनुष) लहानपणापासूनच मुस्लिम मुलगी जोया (सोनम कपूर) हिच्यावर जीवापाड प्रेम करत असतो. कुंदनचं प्रेम साधं नाही तर ते वेडाच्या सीमेला स्पर्श करणारं आहे. जोयासाठी तो मार खातो, मनगट कापतो आणि एक आशिक जे काही वेडेपण करू शकतो ते सगळं करतो. त्याच्यासाठी प्रेम म्हणजे त्याचं संपूर्ण आयुष्य असतं.
मात्र कथा तेव्हा वळण घेते जेव्हा जोया पुढील शिक्षणासाठी दिल्लीतील जेएनयूमध्ये जाते. तिथे तिच्या आयुष्यात अकरम उर्फ अभिमन्यु (अभय देओल) येतो आणि ती त्याच्या प्रेमात पडते. अनेक वर्षे जोयाची वाट पाहणाऱ्या कुंदनसाठी ही गोष्ट स्वीकारणं अशक्य ठरतं. इथूनच सुरू होते प्रेम, फसवणूक, राजकारण, अपराधी भावना आणि गुंतागुंतीचा प्रवास जो संपूर्ण चित्रपटाला वेगळ्याच दिशेने घेऊन जातो.
प्रेक्षकांना अस्वस्थ करून टाकणारी कथा
‘रांझणा’ हा धनुषचा बॉलिवूडमधील पहिला चित्रपट ठरला आणि या सिनेमातून त्याने आपल्या निरागसतेने आणि जबरदस्त अभिनयाने प्रेक्षकांची मनं जिंकली. कुंदनच्या भूमिकेत त्याने असा प्रेमवेडा साकारला आहे ज्याच्यावर कधी राग येतो तर कधी त्याच्यासाठी डोळे भरून येतात. त्याचा त्रास, त्याचं प्रेम आणि त्याचं अपयश प्रेक्षकांना अस्वस्थ करून जातं.
या चित्रपटातील ‘तुम तक’ पासून ते ‘रांझणा’ या टायटल ट्रॅकपर्यंत प्रत्येक गाणं आजही लोकांच्या मनात घर करून आहे. हा चित्रपट स्पष्टपणे सांगतो की प्रेम नेहमीच सुंदर आणि सुखद असतंच असं नाही तर कधी कधी ते अत्यंत वेदनादायकही ठरू शकतं. चित्रपटाचा शेवट हा असा टप्पा आहे जिथे प्रेक्षक आपल्या भावना आवरू शकत नाहीत. म्हणूनच या व्हॅलेंटाईन वीकमध्ये जर तुम्हाला फक्त गुलाबी स्वप्नांपलीकडचं वास्तवाच्या वेदनेला भिडणारं प्रेम पाहायचं असेल तर ‘रांझणा’ हा चित्रपट नक्की पाहा.
