काका पवन कल्याणसाठी प्रचार करणं रामचरणला पडलं महागात; झाली धक्काबुक्की तर काहींनी खेचला शर्ट
दाक्षिणात्य चित्रपटसृष्टीतील सुपरस्टार रामचरणने रविवारी आंध्रप्रदेशमधील पिठापुरम याठिकाणी काका पवन कल्याण यांच्या पक्षासाठी प्रचार केला. यावेळी रामचरणची एक झलक पाहण्यासाठी चाहत्यांनी तुंबड गर्दी केली होती. या गर्दीत काहींनी त्याला धक्काबुक्की केली तर काहींनी त्याचे कपडे खेचले.
साऊथ सुपरस्टार रामचरणचे काका पवन कल्याण हे आंध्रप्रदेशमधील पीठापुरम मतदारसंघातून लोकसभा निवडणूक लढवत आहेत. पवन कल्याण हे मेगास्टार चिरंजीवीचे भाऊ आणि जनसेना पक्षाचे संस्थापक आहेत. त्यांच्या प्रचारासाठी अभिनेता रामचरण रविवारी पीठापुरम याठिकाणी पोहोचला होता. मात्र रामचरणची एक झलक पाहण्यासाठी लोकांनी प्रचंड गर्दी केली. यावेळी काही चाहत्यांनी रामचरणचा शर्टही खेचण्याचा प्रयत्न केला होता. त्याचा व्हिडीओ सध्या सोशल मीडियावर व्हायरल होत आहे. रामचरणचा खूप मोठा चाहतावर्ग आहे. त्यामुळे निवडणूक प्रचारासाठी तो सर्वसामान्यांमध्ये पोहोचला, तेव्हा तुफान गर्दी झाली.
सोशल मीडियावर व्हायरल होत असलेल्या या व्हिडीओमध्ये रामचरणला चाहत्यांच्या गर्दीने घेरल्याचं पहायला मिळत आहे. त्या गर्दीतून बाहेर पडण्याचा पुरेपूर प्रयत्न तो करतोय. मात्र अशातच आजूबाजूचे चाहते त्याचा शर्टसुद्धा खेचतात. काहीजण त्या गर्दीतही मोबाइल काढून रामचरणसोबत सेल्फी काढण्याचा प्रयत्न करतात. अशातच त्याला लोकांच्या धक्काबुक्कीचाही सामना करावा लागतो. रामचरणच्या या व्हिडीओवर नेटकऱ्यांकडून विविध प्रतिक्रिया येत आहेत. ‘हे खूप वाईट आहे. स्टारडमच्या बदल्यात अशी किंमत चुकवावी लागते का? त्यांचा काहीच आदर नाही का’, असं एकाने लिहिलं. तर ‘रामचरणच्या अवतीभवती पुरेशी सुरक्षाव्यवस्था हवी होती’, असं दुसऱ्याने म्हटलंय.
This is bad. Stardom comes with a heavy price and no privacy #RamCharan
— Haricharan Pudipeddi (@pudiharicharan) May 11, 2024
दुसरीकडे रामचरणचा काका पवन कल्याण यांचा दाक्षिणात्य चित्रपटसृष्टीत मोठा चाहतावर्ग आहे. 2008 मध्ये त्यांनी राजकारणात प्रवेश केला. 2014 मध्ये त्यांनी जनसेना पार्टीची स्थापना केली. पवन कल्याण हे मेगास्टार चिरंजीवी यांचे लहान भाऊ आहेत. भावाच्या पक्षासाठी चिरंजीवी यांनीसुद्धा जनतेला आवाहन केलं होतं. “माझा छोटा भाऊ लोकांच्या सेवेसाठी आपल्या पैशांचा वापर करत आहे. त्याच्यावर तुमचा आशीर्वाद कायम राहू द्या”, असं ते म्हणाले होते.
पवन कल्याण यांनी नुकत्याच एका रॅलीदरम्यान अभिनेता शाहरुख खानचा उल्लेख केला होता. “पैशांसाठी मी कधीच माझ्या मूल्यांशी तडजोड करत नाही”, असं ते म्हणाले होते. एका जाहिरातीसाठी शाहरुख खानपेक्षा जास्त पैशांची ऑफर मला मिळाली होती, मात्र जनहिताचा विचार करून मी ती नाकारली, असा खुलासा पवन कल्याण यांनी रॅलीमध्ये केला होता.
