Urfi Javed: ‘उर्फी जावेदचं मॉब लिंचिंग होण्याची शक्यता’; वकिलांची महिला आयोगाकडे तक्रार

मुंबई: भाजप नेत्या चित्रा वाघ यांच्या धमकीमुळे अभिनेत्री उर्फी जावेदचं मॉब लिंचिंग होण्याची शक्यता आहे, अशी तक्रार वकील नितीन सातपुते यांनी राज्य महिला आयोगाकडे केली आहे. ॲड. नितीन सातपुते यांनी महाराष्ट्र राज्य महिला आयोगाला पत्र लिहिलं आहे आणि ऑनलाइन तक्रारसुद्धा दाखल केली आहे. त्यांनी या प्रकरणी आयोगाला हस्तक्षेप करण्याची आणि चित्रा वाघ यांच्याविरोधात पोलीस कारवाईची मागणी केली आहे. “उर्फी जावेद जिथे दिसेल तिथे तिचा थोबाड फोडीन”, असं चित्रा वाघ म्हणाल्या होत्या.

गेल्या काही दिवसांपासून भाजप नेत्या चित्रा वाघ आणि उर्फी जावेद यांच्यात न्यूडिटीवरून मोठा वाद सुरू आहे. सार्वजनिक ठिकाणी न्यूडिटी पसरवल्याचा आरोप करत मुंबई पोलिसांनी उर्फीवर कारवाई करण्याची मागणी त्यांनी केली होती. त्याचं उत्तर देत उर्फीनेही त्यांना म्हटलं होतं, “माझा नंगा नाच असाच सुरू राहील.”

वकील नितीन सातपुते यांनी त्यांच्या तक्रारीत लिहिलं, ‘उर्फी जावेदच्या कपड्यांच्या स्टाइलवरून चित्रा वाघ यांनी लोकांना गुन्हा करण्यास प्रवृत्त केलं आहे. चित्रा वाघ यांचे समर्थक उर्फीला ट्रोल करत तिची प्रतिमा मलिन करत आहेत. इतकंच नाही तर चित्रा वाघ यांनी भररस्त्यात तिचा थोबडा फोडण्याची धमकी दिली आहे. डिसेंबर 2022 मध्ये चित्रा वाघ यांनी माध्यमांशी बोलताना थेट धमकी दिली. ज्यादिवशी उर्फी माझ्यासमोर येईल, तेव्हा मी तिचा थोबाड फोडीन, नंतर ट्विट करून सांगेन की मी काय केलं, अशी धमकी त्यांनी दिली होती.’

‘उर्फीशी कधी आमनासामना झाला तर तिला आधी साडी देणार आणि त्यानंतरही तिचा नंगानाच सुरूच राहिला तर मी सरळ तिचा थोबडा फोडीन, असं चित्रा वाघ म्हणाल्या होत्या. जर उर्फीला कपड्यांची ॲलर्जी असेल तर त्या सर्वप्रकारची औषधं उपलब्ध करून देतील, असंही तिला म्हणाल्या. अशा आक्रमक भाषेमुळे उर्फीवर हिंसक हल्ले होऊ शकतात. त्यामुळे महिला आयोगाने चित्रा वाघ यांच्याविरोधात कारवाई करावी’, अशी मागणी सातपुते यांनी तक्रारीत केली.

चित्रा वाघ यांनी आज (शुक्रवार, 13 जानेवारी) पत्रकार परिषद घेत पुन्हा या वादावर वक्तव्य केलं. ‘सातपुते असो किंवा दसपुते, मी कोणाच्याच बापाला घाबरत नाही. मी महाराष्ट्रात नंगा नाच होऊ देणार नाही’, असं त्या म्हणाल्या.