Donald Trump : वर्षानुवर्ष ज्या देशाने साथ दिली, त्याला एकाक्षणात अमेरिकेने दूर सारलं, चीनमधून निघताच ट्रम्प यांची धक्कादायक वक्तव्य

अमेरिकेचे राष्ट्राध्यक्ष डोनाल्ड ट्रम्प यांनी नुकताच चीनचा दौरा केला. त्यानंतर त्यांनी तैवान संदर्भात केलेल्या एका वक्तव्यावरुन मोठा वाद निर्माण झाला आहे. ट्रम्प यांच्या वक्तव्यानंतर तैवानने लगेच आपली भूमिका स्पष्ट केली. आम्ही पूर्णपणे स्वतंत्र आणि संप्रभु देश आहोत, असं तैवानने म्हटलं आहे. तैवानच्या परराष्ट्र मंत्रालयाने स्पष्ट शब्दात म्हटलय की, “रिपब्लिक ऑफ तैवान एक संप्रभु, स्वतंत्र आणि लोकशाहीवादी देश आहे. चीनला आमच्या संप्रभुतेंवर दावा करण्याचा काही अधिकार नाही” तैवानची इतकी सुस्पष्ट भूमिका ट्रम्प यांना कदाचित खुपू शकते. खरंतर अमेरिकेने नेहमीच तैवानच्या संप्रभुतचे समर्थन केलं आहे. त्यांना शस्त्रास्त्र पुरवली आहेत.

चीन तैवानच्या बाबतीत अनेकदा आक्रमकता दाखवतो. पण अजूनपर्यंत त्यांनी तैवानवर हल्ला करण्याची हिम्मत दाखवलेली नाही. अमेरिका नेहमीच ठामपणे तैवानच्या बाजूने उभी राहिली आहे. पण अमेरिकेचे सध्याचे राष्ट्राध्यक्ष डोनाल्ड ट्रम्प यांनी परराष्ट्र धोरणाचं काहीही महत्व ठेवलेलं नाही.

डोनाल्ड ट्रम्प काय म्हणाले?

अमेरिकेने वर्षानुवर्ष ज्यांच्याशी मैत्री जपली, ज्यांना साथ दिली, त्यांना ट्रम्प आपल्या बडबडीने क्षणात दूर करुन टाकतात. आता तैवानच्या बाबतीत सुद्धा हेच दिसून आलय. फॉक्स न्यूजशी बोलताना डोनाल्ड ट्रम्प यांनी तैवानच्या सुरक्षेबद्दल अमेरिकेच्या पूर्व राष्ट्रपतींच्या तुलनेत खूप सौम्य आणि वेगळी भूमिका घेतली आहे. त्यांनी तैवान आणि अमेरिकेमध्ये असलेल्या अंतराचा हवाला दिला. “तुम्हाला माहिती असेल, आम्हाला एक युद्ध लढण्यासाठी 15,289 किलोमीटरचं अंतर कापून यावं लागेल. असं व्हावं असं मला अजिबात वाटत नाही. तैवानने शांत रहावं आणि चीनने सुद्धा अशी माझी भूमिका आहे” असं डोनाल्ड ट्रम्प फॉक्स न्यूजशी बोलताना म्हणाले.

तैवानला काय इशारा दिला?

“अमेरिकेला नवीन युद्ध नकोय. आता जसं चाललय तसच चालू राहिलं, तर चीनला काही अडचण नाही” असं ट्रम्प म्हणाले. त्यांनी तैवानला इशारा देताना म्हटलं की, “अमेरिका मागे आहे, म्हणून आम्ही स्वतंत्र होतो असं चालणार नाही” त्यावर तैवानने आम्ही संप्रभु देश आहोत असं म्हटलय. ट्रम्प यांच्या दौऱ्यात चीनचे राष्ट्रपती शी जिनपिंग यांनी स्पष्ट शब्दात सांगितलं की, चीन-अमेरिका संबंधात तैवान महत्वाचा आणि संवेदनशील मुद्दा आहे असं चीनच्या सरकारी मीडियाने म्हटलं आहे. ‘तैवान मुद्यावर चीनचे राष्ट्रपती शी जिनपिंग यांना कोणतही ठोस आश्वासन दिलेलं नाही’ असं ट्रम्प एअरफोर्स वन विमानात पत्रकारांशी बोलताना म्हणाले.