इराणच्या डोक्यातही नाही ते इस्रायलनं केलं, अणुशास्त्रज्ञांना मारण्यासाठी AI चा वापर, मोसादचा मोठा गेम!
Israel And Iran War Update : इस्रायल आणि इराण यांच्यातील युद्ध आता चांगलेच पेटले आहे. इस्रायलने इराणवर हल्ला करण्यासाठी आता एआयचा वापर केला आहे.
Israel And Iran War : इस्रायल आणि इराण यांच्या युद्धाचा संपूर्ण जगाने धसका घेतला आहे. इस्रायलने इराणमधूल अणूउर्जा केंद्रांच्या ठिकाणावर हल्ले केल्यानंतर या युद्धाला आणखी भीषण रुप आले आहे. गेल्या अनेक वर्षांपासून इस्रायली सैन्य हा हल्ला करण्यासाठी योजना आखत होतं. हा हल्ला आता इस्रायली गुप्तहेर आणि कृत्रिम बुद्धीमत्तेचा वापर करून करण्यात आल्याचं आता समोर आलं आहे. या हल्ल्याच्या माध्यमातून इस्रायलने इराणच्या अनेक महत्त्वपूर्ण ठिकाणांना लक्ष्य केलं होतं. हा हल्ला करताना इस्रायलने अगोदर इराणच्या एअर डिफेन्स सिस्टिमला नेस्तनाबूत केलं. त्यानंतर इराणच्या अनेक बड्या लष्करी अधिकाऱ्यांना मारण्यात आल्याचं आता समोर आलंय.
अणुउर्जा केंद्रांवर हल्ला करण्यासाठी इस्रायलने काय काय केलं?
मोसादच्या माजी रिसर्च डायरेक्टर सिमा शाई तसेच इस्रायलचे गुप्तचर आणि सैन्य अधिकाऱ्यांशी बातचित करून रॉयटर्स या वृत्तसंस्थेने एक वृत्त प्रकाशित केले आहे. या वृत्तानुसार इस्रायलच्या अधिकाऱ्यांनी नाव जाहीर न करण्याच्या अटीवर इराणच्या अणुउर्जा केंद्रांवर हल्ला करण्यासाठी इस्रायलने काय काय केलं? याची माहिती दिली आहे. गेल्या अनेक वर्षांपासून हा हल्ला करण्यासाठी योजना आखली जात होती, अशी माहिती या अधिकाऱ्यांनी दिली आहे. जोपर्यंत अमेरिकेशी आमची चर्चा होत नाही, तोपर्यंत इस्रायल आमच्यावर हल्ला करणार नाही, असे इराणला वाटले होते. पण इराणचा हा तर्क चुकीचा निघाला आहे.
ऑपरेशन रायझिंग लायन कसे पार पडले?
अमेरिका आणि इराण यांच्यात 15 जून रोजी अणुकार्यक्रमावर चर्चा करण्यासाठी एक बैठक होणार होती. याच्या दोन दिवसांआधीच नेतान्याहू यांनी ऑपरेशन रायझिंग लायन अंतर्गत इस्रायली सैन्याला इराणवर हल्ला करण्यास परवानगी दिली होती. डोनाल्ट ड्रम्प यांनादेखील या बाबीची कल्पना होती, असे सांगितले जात आहे. गेल्या तीन वर्षांपासून या ऑपरेशनवर काम चालू होते.
एआयच्या माध्यमातून टार्गेट निवडले.
या ऑपरेशनअंतर्गत टार्गेटची निवड करण्यासाठी मोसाद या इस्रायलच्या गुप्तचर संस्थेने एआयची मदत घेतली. डेटा प्रोसेस करून इस्रायलच्या कोणत्या ठिकाणांवर हल्ला करता येईल, हे ठरवले. हल्ला होणार त्या वेळी इराणचे लष्करी अधिकारी, वैज्ञानिक नेमके कुठे असतील याचा अंदाज लावण्यात आला. इस्रायलच्या या हल्ल्यात जनरल हुसैन सलामी (रव्हॉल्यूशनरी गार्डचे प्रमुख), जनरल मोहम्मद बाघेरी (इराणी सेनेचे चीफ ऑफ स्टाफ), मिसाईल कार्यक्रम प्रमुख यांच्यासह इराणच्या लष्करातील प्रमुख आठ अधिकारी यात मारले गेले.
दरम्यान, आता इस्रायलने इराणवर हल्ला करण्यासाठी एआयचा वापर केल्यानंतर आता युद्धाची नीती बदलली आहे, हे स्पष्ट होतंय. त्यामुळे आता भविष्यात इराण आणि इस्रायल यांच्यातील संघर्षात नेमकं काय होणार? हे पाहणं महत्त्वाचं ठरणार आहे.
