रोमँटिक बोलण्यामध्ये फसला, देशासोबत गद्दारी करुन बसला, ISI च्या हनी ट्रॅपमध्ये असा अडकला अमन

पाकिस्तानची गुप्तहेर संघटना आयएसआय (ISI) भारतातील तरुणांना डिजिटल जाळ्यात फसवते. प्रेमाच्या अथवा विविध मोहाच्या जाळ्यात अडकून त्यांना हेरगिरी करायला लावते. अशाच एका हायटेक हेरगिरी प्रकरणाचा पर्दाफाश झाला आहे. जम्मू आणि काश्मीर पोलिसांनी एका ड्रायव्हरला अटक केली आहे. अमन असे या आरोपीचे नाव आहे. आयएसआयने त्याला हनीट्रॅपमध्ये अडकवले. त्याने कठुआ येथील घराच्या बाहेर सिम इनेबल्ड स्पाय कॅमेरा बसवला. त्यामुळे भारतीय सैन्याच्या ताफ्याची आणि लष्करी हालचालींची 24X7 लाईव्ह फुटेज पाकिस्तानी हँडलर्संना मिळत होती. जम्मू-काश्मीर पोलीस आणि गुप्तचर यंत्रणांच्या संयुक्त कारवाईत हा भांडफोड झाला. आरोपीविरोधात ऑफिशियल सीक्रेट्स ॲक्टअंतर्गत गुन्हा दाखल करण्यात आला.

असा अडकला आयएसआयच्या जाळ्यात

कठुआ येथील अमन याला पाकिस्तानी एंजट्सनी सोशल मीडियावर फॉलो केले. त्याच्या मॅसेंजरमध्ये अश्लील आणि फ्लर्टी चॅट पाठवले. त्यामुळे तो भाळला. तो हळूहळू हॅनीट्रॅपमध्ये अडकत गेला. त्यानंतर त्याला संवेदनशील कठुआ सीमावर्ती भागातील भारतीय सैन्यांचे तळ, महामार्गाची रेकी करण्यास सांगण्यात आले. आरोपीने घराबाहेर कॅमेरा लावण्यासाठी पाकिस्तानी हँडलर्सकडून 20 हजार रुपये घेतले होते. याचे पेमेंट हे दुबईमार्गे करण्यात आले. पोलिसांनी त्याचा मोबाईल जप्त केला. तो फॉरेन्सिक तपासासाठी पाठवण्यात आला आहे.

जम्मूमध्ये ISI ची नवीन डिजिटल पद्धत

ISI या भागात हनीट्रॅपमध्ये अनेक तरुणांना फसवण्याचा प्रयत्न करत असल्याचे समोर आले आहे. येथील तरुणांचे सोशल मीडिया प्रोफाईल तपासून त्यांच्यावर जाळे फेकण्यात येत आहे. जम्मू परिसरात हनीट्रॅप नेटवर्कची ही दुसरी घटना आहे. आता केवळ फोटो पाठवण्याऐवजी आयएसआयने नवीन पद्धत अवलंबली आहे. त्यांनी 24 तास लाईव्ह सर्व्हिलन्स फीड घेण्याची नवी पद्धत अवलंबली आहे. मे महिन्यात जम्मूच्या मकवाल भागातील तरुण करण कुमार याला स्नॅपचॅटवरून असेच जाळ्यात ओढण्यात आले होते. त्याच्याकडून सैन्याच्या हालचालींचे फोटो आणि व्हिडिओ मागवण्यात आले होते. तर पठाणकोटमध्ये सुजानपूर महामार्गावर स्पाय कॅमेरा लावून सैन्याच्या वाहनांवर नजर ठेवणाऱ्या एका गुप्तहेराला अटक करण्यात आली होती.