Nepal Flood: बाहेर भयंकर पूर अन् शाळेत अडकले होते 1642 विद्यार्थी… मुख्याध्यापकाच्या शहाणपणामुळे वाचले मुलांचे प्राण

Nepal Flash Flood: नेपाळमधील पूर आपत्तीत ७०० हून अधिक लोकांचा मृत्यू झाला आहे. विविध ठिकाणी मदत आणि बचाव पथके अजूनही कार्य करत आहेत. हजारो लोक बेपत्ता आहेत. दरम्यान, येथे दुसऱ्यांदा गंभीर पुराचा इशारा देण्यात आला आहे. तिबेटच्या पर्वतरांगांमध्ये हिमनदी तुटल्यामुळे हा विनाश झाला. पण आता या पुरा दरम्यान शाळेतील शिक्षकाच्या निर्णयाने तब्बल १,६४३ मुलांचे प्राण वाचले आहेत.

नेपाळमधील नुवाकोट जिल्ह्यातील त्रिशुली खोऱ्यातील एका शाळेत १,६४३ मुले उपस्थित होती. मुख्याध्यापक राजेंद्र दवाडी यांनी कोणताही विलंब न करता शाळा रिकामी करण्याचा निर्णय घेतला. हा निर्णय नंतर १,६४३ मुलांसाठी जीवनरक्षक ठरला. बुधवारी सकाळी सुमारे ९:२० वाजता, दवाडी यांना एका मित्राचा फोन आला. त्याने कळवले की गाव नदीच्या प्रवाहात वाहून गेले आहे आणि त्यांना तात्काळ स्थलांतरित होण्याचे आवाहन केले. दवाडी यांना सुरुवातीला वाटले की त्रिभुवन त्रिशुली माध्यमिक शाळा सुरक्षित आहे. तीन मजली काँक्रीटची इमारत नदीपासून सुमारे ६० मीटर उंचीवर होती.

माध्यमांच्या वृत्तानुसार, धोका जाणवताच दवाडी यांनी कोणताही विलंब न करता शाळेची घंटा वाजवली. त्यांनी तात्काळ शिक्षकांना सर्व वर्गखोल्या रिकाम्या करण्याचे निर्देश दिले. त्यांनी बस चालकांनाही फोन करून मागे फिरण्याचे निर्देश दिले, जरी ते पूल ओलांडणारी एक बस थांबवू शकले नाहीत. धोका जाणवल्याने मुले घाबरली. एक मुलगी भीतीने बेशुद्ध झाली आणि तिला तात्काळ सायकलवरून डोंगरावर सुरक्षित ठिकाणी पाठवण्यात आले. इतर मुले पायी डोंगरावर धावत गेली, तर दवाडी कोणीही मागे राहणार नाही याची खात्री करण्यासाठी मागे थांबले. काही मिनिटांतच, सर्व मुले सुरक्षितपणे शिखरावर पोहोचली.

मुले वर पोहोचताच शाळा पूराच्या पाण्यात वाहून गेली. क्षणातच, पाण्याच्या जोरदार प्रवाहाने संपूर्ण इमारत वाहून नेली. काही क्षणांपूर्वी जिथे मुले अभ्यास करत होती, ते ठिकाण आता चिखल, ढिगारे आणि पाण्याने भरलेले एक भयानक दृश्य बनले होते. दवाडींच्या वेळेवर घेतलेल्या निर्णयामुळे १,६४३ मुले आणि जवळजवळ सर्व शिक्षक वाचले, पण ते आपल्या दोन सहकाऱ्यांना या दुर्घटनेचा बळी होण्यापासून वाचवू शकले नाहीत.

इतक्या मुलांचे प्राण वाचवल्यानंतर दवाडी म्हणाले की, “त्या वेळी मी आणखी काय करू शकलो असतो? पाणी आत शिरण्यापूर्वी त्या निष्पाप मुलांना सुरक्षित ठिकाणी पोहोचवणे, हाच त्याच्या मनातला एकमेव विचार होता. “