Pakistan-Iran : इराणच्या लष्करी विमानांना पार्किंग दिली, अमेरिकेसोबत डबल गेमच्या आरोपावर अखेर पाकिस्तानने दिलं उत्तर

पाकिस्तानचा विश्वासघातकी चेहरा पुन्हा एकदा जगासमोर आला आहे. अमेरिका-इराणमध्ये मध्यस्थीचे नाटक करणाऱ्या पाकिस्तानने इराणच्या लष्करी विमानांना आपल्या इथे आसरा दिल्याचं समोर आलं आहे. पाकिस्तानच्या नूर खान एअर बेसवर इराणची लष्करी विमान उभी असल्याचं आज सकाळी वृत्त आलं. अमेरिका-इस्रायलच्या हवाई हल्ल्यामध्ये नुकसान होऊ नये म्हणून पाकिस्तानने इराणच्या लष्करी विमानांना आपल्या इथे पार्किंग दिली. ही बातमी बाहेर आल्यानंतर पाकिस्तानने हे वृत्त फेटाळून लावलं आहे. “CBS चं वृत्त चुकीचं आहे. ही बातमी दिशाभूल करणारी आणि खळबळ उडवून देणारी आहे. आम्ही आमच्या इथे कुठल्याही इराणच्या लष्करी विमानाला पार्किंगची परवानगी दिली नाही” असं आता पाकिस्तानने म्हटलं आहे. हे वृत्त समोर आल्यापासून अमेरिकेत संतापाची लाट उसळली आहे. अनेक अमेरिकी सिनेटर्सनी पाकिस्तानच्या या दुटप्पी भूमिकेवर कडाडून टीका केली आहे. हे पाठित खंजीर खुपसण्यासारखं आहे.

“प्रादेशिक शांतता आणि स्थिरतेसाठी सुरु असलेल्या प्रयत्नांच महत्व कमी करणं हा या अशा बातम्यांमागे उद्देश आहे” असं पाकिस्तानच्या परराष्ट्र मंत्रालयाने म्हटलं आहे. “नूर खान एअरबेसवर इराणची लष्करी विमानं असल्याचं CBS न्यूजच वृत्त आम्ही फेटाळून लावत आहोत. ही पूर्णपणे दिशाभूल करणारी बातमी आहे. काहीही अंदाज बांधून दृष्टीकोन निर्माण करण्याचा आणि प्रादेशिक शांतता आणि स्थिरतेसाठी सुरु असलेल्या प्रयत्नांच महत्व कमी करणं हा उद्देश यामागे आहे” असं पाकिस्तानने म्हटलं आहे.

पाकिस्तानने काय मान्य केलं?

सीजफायरची चर्चा सुरु असताना इस्लामाबादमध्ये पहिल्या राऊंडच्या बोलणीसाठी अमेरिकन आणि इराणी विमानं पाकिस्तानात आली होती असं पाकिस्तानी मंत्रालयाने म्हटलं आहे. डिप्लोमॅट, सुरक्षा रक्षक आणि प्रशासकीय स्टाफ यांच्यासाठी ही विमान वापरण्यात आलेली. पुढच्या फेरीच्या काही चर्चा होतील म्हणून काही विमानं आणि सपोर्ट स्टाफ पाकिस्तानात असल्याचं मंत्रालयाने म्हटलं आहे. अधिकृत चर्चा अजून सुरु झालेल्या नाहीत. पण वरिष्ठ पातळीवर कूटनितीक आदान-प्रदान सुरु आहे. सीजफायरच्यावेळी पाकिस्तानात आलेलं इराणचं विमान अजूनही तिथे थांबलं असल्याचं पाकिस्तानने मान्य केलं. लष्करी विमानांसाठी अशी कुठलीही व्यवस्था केलेली नाही असं पाकिस्तानकडून सांगण्यात आलं.

त्यातून काही तोडगा निघाला नव्हता

अमेरिका-इराण युद्धात मागच्या महिन्यात सीजफायरची घोषणा झाल्यानंतर पाकिस्तानात पहिल्या फेरीची चर्चा झाली होती. पण त्यातून काही तोडगा निघाला नव्हता. अमेरिका-इराण अजूनही आपपाल्या भूमिकेवर ठाम आहेत. हा सीजफायर कुठल्याही क्षणी तुटेल आणि युद्धाला सुरुवात होईल अशी स्थिती आहे.