पाकिस्तानात मोठा ट्विस्ट, इमरान खान तडजोडीला तयार? थेट आसिम मुनीर यांच्याशी…

पाकिस्तानचे माजी पंतप्रधान इमरान खान यांना तुरुंगातून रुग्णालयात शिफ्ट केल्यानंतर पाकिस्तान तहरीक ए इन्साफ पक्षाच्या भूमिकेत मोठा बदल झाला आहे. जर इमरान खान यांची तुरुंगातून सुटका झाली तर आम्ही आर्मी चीफ आसिम मुनीर यांच्याविरोधात कोणतीही भूमिका घेणार नाही, असं पीटीआयचे प्रवक्ते जुल्फिकार बुखारी यांनी म्हटलं आहे. इमरान खान यांना तुरुंगातून रुग्णालयात नेण्याचे कोर्टाने आदेश देण्यात आले. इमरान खान यांना तीन दिवस रुग्णालयात ठेवलं. त्यानंतर परत अदियाला तुरुंगात नेण्यात आलं, अशावेळी पीटीआयकडून ही प्रतिक्रिया आली आहे.

जुल्फिकार बुखारी यांनी इंग्रजी वृत्तसंस्थेला ही प्रतिक्रिया दिली आहे. इमरान खान यांना जर उद्याच सोडून देण्यात आलं तर देशाचं नुकसान होईल असं आम्ही काहीच करणार नाही. इमरान खान उदारमतवादी विचारांचे नेता आहे. देशाचं हितच त्यांच्यासाठी सर्वोच्च आहे, असं जुल्फिकार बुखारी यांनी म्हटलं आहे.

बुखारी काय म्हणाले?

इमरान खान सैन्य नेतृत्वाशी थेट लढाई करेल असा याचा अर्थ नाही. देशाच्या उज्ज्वल भविष्यासाठी व्यक्तीला आपलं दु:ख, वेदना आणि राग नियंत्रित करावा लागतो, असं बुखारी यांनी म्हटलं. दरम्यान, इमरान खान आणि पाकिस्तानच्या सैन्या दरम्यान दीर्घकाळापासून वाद सुरू आहे. 2023मध्ये इमरान खानच्या अटकेनंतर त्यांच्या समर्थकांनी आर्मी चीफ आसिम मुनीर यांच्या विरोधात सातत्याने निदर्शने केली होती. मुनीर यांच्यामुळेच इमरान खान यांच्या अडचणी वाढल्याचं इमरान समर्थकांचं म्हणणं आहे. स्वत: इमरान खान यांनीही मुनीर यांच्यावर तिखट शब्दात हल्ला चढवला होता.

इमरान तडजोडीला तयार?

पीटीआयकडून आलेल्या या प्रतिक्रियेचे अनेक अर्थ काढले जात आहेत. पीटीआयचा मुनीर विरोध मावळल्याचं बोललं जात आहे. त्यामुळे पाकिस्तानचं राजकारणातील सैन्य आणि इमरान खान यांच्यात सुरू असलेला वाद संपुष्टात येण्याचे संकेतही या निमित्ताने मिळत आहेत. मात्र, इमरान खान सैन्य नेतृत्त्वाच्या समोर तडजोडीला तयार आहेत की नाही हे अद्याप स्पष्ट झालेलं नाही. पाकिस्तानी सरकार आणि सैन्याने बुखारी यांच्या विधानावर कोणतीही प्रतिक्रिया दिलेली नाही. सैन्याने यापूर्वीही राजकारणात हस्तक्षेप करत नसल्याचं म्हटलं जात आहे. तर, इमरान खान यांच्याशी सुरू असलेली प्रकरणं कोर्टाशी संबंधित असल्याचं सरकारने म्हटलं आहे.