‘डोनाल्ड ट्रम्प’ची देणार होते कुर्बानी! पीएम यांना लागली कुणकुण, रातोरात वाचवला जीव

बांगलादेशात ‘डोनाल्ड ट्रम्प’ नावाने प्रसिद्ध झालेला एक दुर्मिळ अल्बिनो (पांढरा) रेड्याची आता कुर्बानी दिली जाणार नाही. शेवटच्या क्षणी पंतप्रधान तारिक रहमान यांच्या सरकारने त्याची कुर्बानी थांबवली आणि त्याला थेट नॅशनल झू (राष्ट्रीय प्राणीसंग्रहालय) मध्ये पाठवण्याचा निर्णय घेतला. हा रेडा ईदच्या कुर्बानीसाठी विकला गेला होता. लोक त्याला पाहण्यासाठी तुफान गर्दी करत होते. सोशल मीडियावर तो इतका व्हायरल झाला की सरकारला यात मध्यस्थी करावी लागली. सुमारे ७०० किलो वजन असलेल्या या रेड्याची सर्वात मोठी ओळख त्याच्या डोक्यावर झुलणारे सोनेरी केस बनले. लोकांना त्याची हेअरस्टाईल अमेरिकेचे राष्ट्राध्यक्ष डोनाल्ड ट्रम्प यांच्यासारखी वाटली, मग काय, इंटरनेटने त्याचे नावच ‘डोनाल्ड ट्रम्प’ ठेवले.

बांगलादेशचे गृहमंत्री सलाहुद्दीन अहमद यांच्या आदेशानंतर सरकारने खरेदीदाराचे पैसे परत करण्याचा आणि रेड्याला ढाक्याच्या नॅशनल झूमध्ये हलवण्याचा निर्णय घेतला. अधिकाऱ्यांच्या मते, असामान्य पातळीवरील लोकांची आवड आणि सुरक्षेच्या चिंतेमुळे हे पाऊल उचलण्यात आले. एका मंत्रालयाच्या अधिकाऱ्याने सांगितले की, ‘शेवटच्या वेळी निर्णय घेण्यात आला की सुरक्षेच्या कारणास्तव आणि लोकांची आवड पाहता या रेड्याची कुर्बानी दिली जाणार नाही.’ मात्र असेही मानले जात आहे की, ट्रम्प यांच्या नावाने कुर्बानी व्हावी असे बांगलादेश सरकारला वाटत नव्हते, कारण त्यांना कोणताही अनावश्यक तणाव नको होता.

असा झाला व्हायरल, पाहण्यासाठी लागली जत्रा

सुरुवातीला हा फक्त ईदवर कुर्बानीसाठी खरेदी केलेला एक सामान्य प्राणी होता, पण सोशल मीडियावर व्हिडीओ व्हायरल होताच तो संपूर्ण बांगलादेशात चर्चेचा विषय बनला. ढाक्याजवळील नारायणगंज येथील फार्मवर मोठी गर्दी जमू लागली. लोक दुरून-दुरून फक्त या अनोख्या रेड्याला पाहण्यासाठी पोहोचत होते. फार्मचे मालक जियाउद्दीन मृधा यांनी सांगितले की, त्यांच्या लहान भावाने सर्वात आधी या रेड्याचे केस पाहून त्याचे नाव ‘डोनाल्ड ट्रम्प’ ठेवले होते. त्याला वाटले की रेड्याचे सोनेरी केस ट्रम्प यांच्या प्रसिद्ध हेअरस्टाईलसारखे दिसतात. मृधा यांच्या मते, चार वर्षांच्या या अल्बिनो रेड्याला सुमारे १० महिन्यांपूर्वी खरेदी करण्यात आले होते. याची विशेष काळजी घ्यावी लागते, ज्यामध्ये नियमित जेवण आणि वारंवार आंघोळ घालणे समाविष्ट आहे. त्यांनी सांगितले की इतर रेड्यांच्या तुलनेत हा अतिशय शांत स्वभावाचा आहे.

अल्बिनो रेडे एवढे खास का असतात?

बांगलादेशात अल्बिनो रेडे अत्यंत दुर्मिळ मानले जातात. तिथे बहुतांश रेड्यांचा रंग काळा किंवा गडद राखाडी असतो. अल्बिनिझम ही एक अनुवांशिक (जेनेटिक) स्थिती आहे, ज्यामध्ये शरीरात मेलेनिन तयार होत नाही. याच कारणामुळे त्वचा फिकट, केस सोनेरी किंवा पांढरे आणि नाक गुलाबी दिसते. याच दुर्मिळतेमुळे असे प्राणी ईदच्या काळात लोकांचे लक्ष वेधून घेतात. पण अधिकाऱ्यांचे म्हणणे आहे की, या रेड्याला वाचवण्याचे सर्वात मोठे कारण त्याची व्हायरल लोकप्रियता आणि वाढती गर्दी होती. आता हा ‘डोनाल्ड ट्रम्प’ नावाचा रेडा ढाक्याच्या नॅशनल झूमध्ये ठेवला जाईल, जिथे तो एक विशेष आकर्षण राहील अशी अपेक्षा आहे.