‘धुरंधर’मध्ये जे घडलं तेच पाकिस्तानात…उझैर बलोचच्या भावावर धाड-धाड गोळीबार, ल्यारीत गँगवॉर भडकणार

गँगवॉरमुळे पाकिस्तान पुन्हा एकदा चर्चेत आले आहे. धुरंधर चित्रपटात दाखवण्यात आलेल्या कराचीतील कुख्यात ल्यारीत पुन्हा एकदा दोन गटातील वाद उभाळून आल्याचे समोर आले आहे. गुरुवारी सायंकाळी कुख्यात गँगस्टर उझैर बलोच याचा भाऊ जुबैर बलोच याच्यावर अज्ञात हल्लेखोरांनी गोळीबार केला आहे. या हल्ल्यात तो गंभीर जखमी झाल्याचे समोर आले आहे. पोलिसांनी दिलेल्या माहितीनुसार, मिर्झा आदम खान रोडवरील या घटनेत किमान तीन जण जखमी झाले आहेत.

कराची साऊथच्या पोलिस अधिकाऱ्यांनी सांगितले की, ‘जखमींपैकी एक जण हा बंदी घालण्यात आलेल्या पीपल्स अमन कमिटी या संघटनेचा प्रमुख उझैर बलोच याचा भाऊ जुबैर बलोच असण्याची शक्यता आहे. मात्र, त्याची अधिकृत ओळख अद्याप पटलेली नाही. डॉन वृत्तपत्राच्या वृत्तानुसार, मोटारसायकलवर आलेल्या हल्लेखोरांनी चेहरे झाकले होते. त्यांनी जुबैरवर गोळीबार केला. यात तो गंभीर जखमी झाला आहे. या घटनेवेळी जुबैर बलोच आपल्या घराबाहेर उभा होता.

धुरंधर चित्रपटात ल्यारी गँगवॉरची झलक

2026 मध्ये प्रदर्शित झालेल्या धुरंधर सिनेमात अभिनेता दानिश पंडोर यांनी उझैर बलोचची भूमिका साकारली होती, तर उझैरचा गुरु रहमान डाकैत याची भूमिका अभिनेता अक्षय खन्ना यांनी साकारली होती. हा चित्रपटात गँगवॉरची झलकही दाखवण्यात आली होती.

तपास सुरू

समोर आलेल्या माहितीनुसार, जुबैर बलोचला 2012 मध्ये अटक करण्यात आली होती आणि गेल्या वर्षी जानेवारीमध्ये त्याची सुटका झाली होती. पोलिस या हल्ल्याचा गँगमधील अंतर्गत वैर, वैयक्तिक शत्रुत्व आणि इतर शक्य कारणांवरून तपास करत आहेत. जुबैरवरील हल्ल्यानंतर स्थानिक नागरिकांमध्ये ल्यारीतील गँगवॉर पुन्हा सुरू होण्याची भीती निर्माण झाली आहे. मात्र कराची पोलिसांनी अद्याप या हल्ल्याबाबत अधिकृत प्रतिक्रिया दिलेली नाही.

ल्यारीतील एका सामाजिक कार्यकर्त्याने सांगितले की, काही महिन्यांपूर्वी जुबैर बलोच एका राजकीय पक्षात सहभागी झाला होता आणि त्याने परिसरात त्या पक्षाचे झेंडेही लावले होते. त्याच कार्यकर्त्याने असेही सांगितले की, कराची ऑपरेशन नंतर दुबई आणि इराणमध्ये पळून गेलेले काही गँगस्टर अमेरिका-इराण युद्धानंतर पुन्हा कराचीत परतल्याच्या अफवा परिसरात पसरल्या आहेत.