UIDAI नवीन आधार ॲप लवकरच mAadhaar ची घेणार जागा, यापद्धतीने करा डाऊनलोड

भारतीय विशिष्ट ओळख प्राधिकरणाने (UIDAI) शुक्रवारी जाहीर केले की सध्याचे mAadhaar ॲप लवकरच बंद केले जाईल. प्राधिकरणाने वापरकर्त्यांना नुकत्याच लाँच केलेल्या नवीन आधार ॲपवर स्थलांतरित होण्यास सांगितले आहे. आयफोनसाठी ॲप स्टोअर आणि अँड्रॉइडसाठी गूगल प्ले स्टोअरवर हा ॲप उपलब्ध आहे.

या ॲपचा उद्देश नागरिकांना त्यांची आधार माहिती सुरक्षितपणे साठवण्यासाठी, अद्ययावत करण्यासाठी आणि इतरांसोबत शेअर करण्यासाठी मदत करणे आहे. नवीन ॲपमध्ये क्यूआर-आधारित आधार शेअरिंग, फ़ेस ऑथेंटिकेशन, बायोमेट्रिक लॉक कंट्रोल्स आणि निवडक माहिती शेअर करणे यांसारखी वैशिष्ट्ये उपलब्ध आहेत.

UIDAI ने पुष्टी केली आहे की mAadhaar ॲप यापुढे उपलब्ध राहणार नाही

X वरील एका अधिकृत पोस्टमध्ये UIDAI ने mAadhaar ॲप लवकरच बंद केले जात असल्याची पुष्टी केली आहे. प्राधिकरणाने असेही म्हटले आहे की, नवीन आधार ॲप “अधिक स्मार्ट, जलद आणि अधिक सुरक्षित डिजिटल प्रवास” प्रदान करण्यासाठी डिझाइन केले आहे. नवीन आधार ॲप अधिक चांगल्या सुलभतेसाठी 13 भारतीय भाषांना सपोर्ट करते.

UIDAI च्या मते, नवीन आधार ॲपचे सर्वात मोठे वैशिष्ट्य म्हणजे QR-आधारित आधार शेअरिंग आणि ऑफलाइन ओळख पडताळणी. ‘सिलेक्टिव्ह शेअर’ हे फिचर्स वापरकर्त्यांना त्यांचा आधार क्रमांक उघड न करता त्यांची ओळख पडताळण्याची परवानगी देते. यामुळे त्यांना त्यांचा फोटो, नाव, वय, लिंग, मोबाईल नंबर, पत्ता किंवा आधार स्थिती यासारखी माहिती शेअर करायची आहे, हे निवडता येते.

The #mAadhaar App is retiring soon. Now experience a smarter, faster, and more secure digital journey with the new #AadhaarApp. From secure QR-based #Aadhaar sharing to enhanced privacy controls and seamless access to Aadhaar services — the new app is designed to make your… pic.twitter.com/snfeUx4Rgr

— Aadhaar (@UIDAI) May 15, 2026

हे ॲप एक QR कोड देखील तयार करते, जो ओळखीसाठी अधिकृत टर्मिनलवर स्कॅन केला जाऊ शकतो. UIDAI च्या म्हणण्यानुसार, या ॲपद्वारे वापरकर्ते त्यांचा आधार-संबंधित मोबाईल नंबर आणि पत्ता थेट अद्ययावत करू शकतात. तसेच, प्रोफाईल विभागात जाऊन ते त्यांच्या अकाउंटमध्ये कुटुंबातील पाच सदस्यांपर्यंतची माहिती जोडू शकतात.

यात बायोमेट्रिक लॉकिंग कंट्रोल्स देखील आहेत. गैरवापर टाळण्यासाठी फिंगरप्रिंट, चेहरा आणि आयरिस ऑथेंटिकेशन डेटा लॉक करण्यासाठी याचा वापर केला जाऊ शकतो. आवश्यक असल्यास हे लॉक ॲपद्वारे काढता येते. तथापि UIDAI ने असेही म्हटले आहे की, जर जोडलेला फोन नंबर किंवा स्मार्टफोन हरवला, तर वापरकर्त्यांना आधार-संबंधित सेवांपासून तात्पुरते बाहेर काढले जाऊ शकते.

जुन्या एम-आधार ॲपमधील डेटा नवीन ॲपमध्ये आपोआप हस्तांतरित होईल की नाही, हे UIDAI ने अद्याप स्पष्ट केलेले नाही. त्यामुळे, विद्यमान वापरकर्त्यांना नवीन ॲप डाउनलोड केल्यानंतर त्यांचे प्रोफाइल पुन्हा मॅन्युअली तयार करावे लागेल.

नवीन आधार ॲप कसे डाउनलोड करावे आणि त्यासाठी नोंदणी कशी करावी?

नवीन आधार ॲप अँड्रॉइडसाठी गूगल प्ले स्टोअरवर आणि आयओएससाठी ॲप स्टोअरवर उपलब्ध आहे.

आधार ॲप उघडा आणि तुमची भाषा निवडा.

तुमच्या आधार-संलग्न मोबाईल नंबर किंवा इतर कोणत्याही नंबरचा वापर करून ॲपसाठी नोंदणी करा. इतर नंबरसाठी अतिरिक्त ऑथेंटिकेशन आवश्यक असेल.

तुमचा 12 अंकी आधार क्रमांक प्रविष्ट करा आणि ओटीपीद्वारे एसएमएस पडताळणी पूर्ण करा.

पुढे तुम्हाला चेहरा ओळख पटवण्यास सांगितले जाईल. अशातच पुरेसा उजेड आणि तुम्ही चष्मा घालत असाल तर तो काढून टाका.

आता ॲप वापरण्यासाठी सहा अंकी पासवर्ड सेट करा.

आता तुम्हाला ॲपच्या होम पेजवर नेले जाईल, जिथे तुम्ही तुमचे आधार कार्ड पाहू शकता, ते इतरांसोबत शेअर करू शकता आणि बायोमेट्रिक लॉक सेट करू शकता.