चुटकीसरशी हवंय स्वच्छ घर? वापरून बघा हे घरगुती क्लिनिंग सोल्यूशन्स!

घर स्वच्छ ठेवणं म्हणजे फक्त सौंदर्य नव्हे, तर आरोग्याचंही संरक्षण. स्वच्छ घरात सकारात्मक ऊर्जा वावरते, आणि त्यात राहणाऱ्या व्यक्तींचं मनही प्रसन्न राहतं. पण प्रत्येकवेळी बाजारातील महागडे क्लिनिंग प्रॉडक्ट्स विकत घेणं शक्य होतंच असं नाही. शिवाय, त्यात वापरलेले केमिकल्स आरोग्यासाठी हानिकारक असू शकतात. अशा वेळी घरात सहज उपलब्ध असलेल्या वस्तूंनी तयार करता येणारी घरगुती क्लिनिंग सोल्यूशन्स उपयोगी ठरतात. आज आपण अशाच काही उपायांवर नजर टाकणार आहोत, जे तुम्हाला कमी खर्चात आणि चुटकीसरशी स्वच्छता मिळवून देतील.

1. व्हिनेगर आणि बेकिंग सोडा

व्हिनेगर (सिरका) आणि बेकिंग सोडा हे दोघे मिळून एक अतिशय प्रभावी क्लिनर तयार करतात. हे मिश्रण सिंक, टॉयलेट बाऊल, टाइल्स, आणि स्टीलच्या भांड्यांवरील डाग स्वच्छ करण्यासाठी उत्तम आहे. फक्त बेकिंग सोडा थोडासा पृष्ठभागावर टाका, त्यावर व्हिनेगर शिंपडा, आणि काही वेळाने स्क्रब करून पुसून टाका.

2. लिंबाचा रस

लिंबाचा रस अ‍ॅसिडिक असल्यामुळे त्यात बॅक्टेरिया मारण्याची ताकद असते. लिंबाचा रस थेट स्वयंपाकघरातील ओटा, फ्रीज किंवा मायक्रोवेव्हच्या आत साफसफाईसाठी वापरता येतो. यामुळे ताजेतवाने वासही येतो. एक वाटी पाण्यात लिंबाचा रस मिसळून स्प्रे बॉटलमध्ये भरल्यास, तो रोजच्या साफसफाईसाठी वापरता येईल.

3. गरम पाण्यात मीठ आणि साबणाचा वापर

जमिनीच्या स्वच्छतेसाठी गरम पाण्यात थोडं मीठ आणि डिश वॉश लिक्विड मिसळून पुसल्यास, धुळीचे थर आणि चिकटपणा सहज निघून जातो. या उपायाने टाइल्सवरील डागदेखील दूर होतात आणि जमिनीला चमक येते.

4. फर्निचर क्लिनिंगसाठी नारळाचं तेल

घरातील लाकडी फर्निचरवर धूळ बसते आणि कधी कधी त्यावर खरचटलेल्या खुणा ही दिसतात. अशा वेळी नारळाचं तेल आणि लिंबाचा रस यांचं मिश्रण वापरल्यास फर्निचर नवीनसारखं झळकू लागतं. यामुळे लाकडाचा पोतही टिकून राहतो.

5. बाथरूमसाठी अ‍ॅल्कोहोल स्प्रे

बाथरूममधील नळ, काच आणि टाइल्स यांच्यावर बॅक्टेरिया लवकर वाढतो. त्यासाठी 70% इथेनॉल असलेला अल्कोहोल स्प्रे वापरणं उपयुक्त ठरतं. बाजारात मिळणाऱ्या हँड सॅनिटायझरचा वापरही यासाठी करता येतो. तो काच किंवा नळांवर शिंपडून, कोरड्या कपड्यानं पुसल्यास चकाकी दिसून येते.