Nashik Corona : नाशिकमध्ये कोरोना कसा पोहोचला?

नाशिक : भारतासह जगभरात कोरोना विषाणूने धुमाकूळ घातला (Nashik Corona patient) आहे. राज्यात कोरोनाग्रस्तांचा आकडा सव्वा दोनशेकडे वाटचाल करत आहे. नाशिकमध्ये एकही रुग्ण नसल्याने सर्वांनी सुटकेचा निश्वास सोडला होता, मात्र रविवारी संध्याकाळी एक रुग्ण पॉझिटिव्ह आढळल्याने, इथेही धाकधूक वाढली आहे. (Nashik Corona patient)

हा रुग्ण लासलगावजवळील पिंपळगावनजीक राहणारा आहे. ग्रामीण भागातील हा रुग्ण परदेशात गेलेला नसूनही पॉझिटिव्ह सापडला. मात्र तो कोणाच्यातरी संपर्कात आला असावा, त्यातूनच हा संसर्ग झाल्याचं आता स्पष्ट होत आहे.

आज सोमवारी सकाळपासून लासलगावातील सर्वच अत्यावश्यक सेवेत असलेले किराणा, भाजीपाला दुकाने बंद असल्याने शुकशुकाट दिसत आहे. निमगाव वाकडा प्राथमिक आरोग्य केंद्राकडून या परिसरतील नागरिकांच्या घरी जाऊन विचारपूस सुरू झाली आहे. नाशिक येथून 90 जणांचा समावेश असलेलं पथक आरोग्य तपासणीसाठी येत असून, या पथकाकडून पिंपळगावनजीक, लासलगाव, ब्राह्मणगाव विंचुर या तीन गावातील नागरिकांची तपासणी होणार आहे.

बेकरी व्यावसायिक नाशिक जिल्ह्यात पहिला पॉझिटिव्ह सापडलेला रुग्ण बेकरी व्यवसायिक आहे. हा रुग्ण बेकरीच्या कामासाठी मुंबई येथे दोन वेळा जाऊन आला असल्याची माहिती मिळते. यानंतर बारा मार्च रोजी त्याला खोकला, सर्दी आणि ताप आल्याने स्थानिक खासगी डॉक्टरांकडून तपासणी केली.

डॉक्टरांकडून न्यूमोनिया झाल्याचे उपचारही सुरू होते, मात्र प्रकृतीत सुधारणा होत नसल्याने, त्याला लासलगाव येथील ग्रामीण रुग्णालयात तपासणीसाठी नेले होते. तिथून त्याला नाशिक येथील शासकीय जिल्हा रुग्णालयात भरती करण्यात आलं. तिथे त्याची कोरोना चाचणी करण्यात आली असता, 29 मार्च रविवारी संध्याकाळी तपासणी अहवालात पॉझिटिव्ह असल्याचे निष्पन्न झाले.

संबंधित बातम्या 

जगातील पहिल्या कोरोनाबाधित महिलेचा चीन सरकारवर निशाणा    

21 दिवसांचा लॉकडाऊन वाढण्याच्या चर्चा, अखेर केंद्र सरकारकडून स्पष्टीकरण