मधुमेहाचा धोका कमी करायचाय? जेवणानंतर फक्त 10 मिनिटं करा हे काम, मिळतील अनेक फायदे

जेवण झाल्यानंतर लगेच आराम करण्याची अनेकांना सवय असते. मात्र, जेवणानंतर काही मिनिटे हलके चालण्याची सवय लावल्यास आरोग्यासाठी त्याचे अनेक फायदे होऊ शकतात. विशेषतः डायबेटीस असलेल्या व्यक्तींसाठी जेवणानंतरची संथ चाल किंवा ‘स्लो वॉक’ फायदेशीर ठरू शकते. रक्तातील साखरेची पातळी नियंत्रणात ठेवण्यासोबतच वजन, हृदयाचे आरोग्य आणि मेटाबॉलिझम सुधारण्यासही यामुळे मदत होऊ शकते. त्यामुळे रोजच्या व्यस्त दिनचर्येत वेगळा वेळ काढणे शक्य नसले, तरी जेवणानंतरची काही मिनिटांची वॉक आरोग्यासाठी महत्त्वाची ठरू शकते.

डायबेटीस नियंत्रणात ठेवण्यासाठी आहारासोबत नियमित शारीरिक हालचालही महत्त्वाची आहे. यासाठी नेहमीच वेगाने चालण्याची किंवा कठीण व्यायाम करण्याची गरज नसते. जेवणानंतर काही वेळ हलके किंवा संथ चालल्याने शरीराला ग्लुकोजचा वापर करण्यास मदत होऊ शकते.

अमेरिकेच्या स्पोर्ट्स मेडिसिन जर्नलमध्ये प्रकाशित संशोधनानुसार, लंच किंवा डिनरनंतर साधारण अर्ध्या तासाने 10 ते 15 मिनिटे हळू चालल्याने रक्तातील साखरेची पातळी कमी होण्यास मदत होऊ शकते. त्यामुळे जेवणानंतर थोडा वेळ चालण्याची सवय दैनंदिन दिनचर्येत समाविष्ट करणे फायदेशीर ठरू शकते.

तज्ज्ञ काय सांगतात?

जेवणानंतर चालल्याने स्नायू रक्तातील ग्लुकोजचा अधिक चांगल्या पद्धतीने वापर करू शकतात. यामुळे रक्तातील साखरेची पातळी नियंत्रणात ठेवण्यास मदत होऊ शकते. नियमित वॉकमुळे तणाव कमी होणे आणि झोपेची गुणवत्ता सुधारण्यासही मदत होऊ शकते, असे तज्ज्ञ सांगतात.

स्लो वॉकचे प्रमुख फायदे

१. जेवणानंतर हलके चालल्याने रक्तातील साखरेची पातळी नियंत्रित ठेवण्यास मदत होऊ शकते.

२. नियमित स्लो वॉकमुळे शरीराला इन्सुलिनचा अधिक प्रभावीपणे वापर करता येऊ शकतो.

३. नियमित चालण्यामुळे हृदय निरोगी ठेवण्यास मदत होते.

४. स्लो वॉकमुळे शरीरातील चयापचयाची प्रक्रिया सुरळीत राहण्यास मदत होऊ शकते.

५. नियमित चालण्यामुळे कॅलरी बर्न होण्यास मदत होते आणि वजन नियंत्रणात ठेवणे सोपे जाते.

६. नियमित चालण्यामुळे शरीराची हालचाल आणि संतुलन सुधारण्यास मदत होऊ शकते.

७. नियमित शारीरिक हालचालीमुळे रक्तदाब नियंत्रणात ठेवण्यास हातभार लागू शकतो.

८. चालण्यामुळे तणाव कमी होण्यास आणि मानसिक आरोग्य सुधारण्यास मदत होऊ शकते.

९. नियमित वॉकमुळे एकाग्रता, सतर्कता, स्मरणशक्ती आणि विचार करण्याची क्षमता सुधारण्यास मदत होऊ शकते. रोजच्या दिनचर्येत सहज करता येते वॉक

स्लो वॉक हा तुलनेने सोपा आणि कमी जोखमीचा व्यायाम मानला जातो. यासाठी जिममध्ये जाण्याची किंवा कोणत्याही विशेष उपकरणांची आवश्यकता नसते. जेवणानंतर आपल्या क्षमतेनुसार काही मिनिटे हलके चालण्यापासून सुरुवात करता येऊ शकते. आरामदायक कपडे आणि योग्य शूज वापरल्यास नियमित चालण्याची सवय लावणे अधिक सोपे होते.