Gen Z च्या सुट्टीचा नवा फंडा… आधी कॉन्सर्ट, मग ठरतं डेस्टिनेशन; असा करतात ट्रिपचा प्लॅन!

आजची Gen Z पिढी ट्रॅव्हलिंगचा पारंपरिक फॉर्म्युला बदलताना दिसत आहे. पूर्वी आधी गोवा, जयपूर किंवा दुबईसारखं डेस्टिनेशन ठरवलं जायचं, त्यानंतर फ्लाइट आणि हॉटेल बुकिंग करून शेवटी ‘काय करायचं?’ याची यादी तयार केली जायची. मात्र, Gen Z ने हा संपूर्ण क्रमच बदलला आहे. आता ट्रिपची सुरुवात एखाद्या कॉन्सर्टच्या तिकिटापासून, म्युझिक फेस्टिव्हल, थीम पार्क, फूड एक्सपीरियन्स किंवा एखाद्या खास कार्यक्रमापासून होऊ शकते आणि त्यानंतर त्या अनुभवासाठी डेस्टिनेशन ठरवलं जातं. त्यामुळे आता ‘कुठे जायचं?’पेक्षा ‘काय अनुभवायचं?’ याला अधिक महत्त्व दिले जात आहे.

Gen Z च्या या बदलत्या ट्रॅव्हल ट्रेंडचं मोठं उदाहरण म्हणजे कॉन्सर्ट आणि म्युझिक फेस्टिव्हल. Airbnb च्या 2026 मधील ‘Experience-led Travel Insights’नुसार, 62 टक्के भारतीय Gen Z प्रवाशांनी कॉन्सर्ट किंवा म्युझिक फेस्टिव्हलसाठी प्रवास करण्याची योजना आखली होती. तर 76 टक्के जणांनी सांगितलं की, एखाद्या कॉन्सर्ट किंवा फेस्टिव्हलमुळे ते पहिल्यांदाच एखाद्या शहरात गेले. यातील निम्म्याहून अधिक जणांनी कार्यक्रमानंतर त्या शहरात फिरण्यासाठी मुक्कामही वाढवला. म्हणजेच एखादा खास अनुभव हा प्रवासाचा सुरुवातीचा ट्रिगर ठरतो आणि त्यानंतर डेस्टिनेशन त्या अनुभवाचा भाग बनतं.

तीन दिवसांची छोटी ट्रिप ठरतेय पसंतीची

लांबच्या सुट्टीपेक्षा Gen Z आता छोट्या ट्रिपला पसंती देत असल्याचे या रिपोर्टमध्ये नमूद करण्यात आले आहे. Airbnb च्या 2026 च्या संशोधनानुसार, 10 पैकी 7 भारतीय Gen Z प्रवासी एका मोठ्या वार्षिक सुट्टीपेक्षा तीन दिवसांच्या छोट्या ट्रिपला पसंती देतात. यामागे कमी वेळात एखादा खास अनुभव घेण्याची इच्छा हा एक महत्त्वाचा घटक आहे.

कॉन्सर्टपासून फूड फेस्टिव्हलपर्यंत

Gen Z च्या ट्रिपचा ट्रिगर केवळ कॉन्सर्ट नसतो. थीम पार्क, फूड फेस्टिव्हल, स्पोर्टिंग इव्हेंट, वेलनेस रिसॉर्ट किंवा सोशल मीडियावर पाहिलेला एखादा खास अनुभवही प्रवासाचं कारण ठरू शकतो. सोशल मीडियामुळे एखादा कॅफे, म्युझिक फेस्टिव्हल, अॅडव्हेंचर अॅक्टिव्हिटी किंवा सुंदर ठिकाण पाहून त्यासाठी खास ट्रिप प्लॅन करण्याचा ट्रेंडही वाढत आहे.

भारतातील पर्यटनालाही मिळू शकतो फायदा

या ट्रेंडमुळे देशात फिरण्याच्या पद्धतीतही बदल होऊ शकतो. एखाद्या शहरातील प्रसिद्ध पर्यटनस्थळांपेक्षा कॉन्सर्ट, म्युझिक फेस्टिव्हल, थीम पार्क, स्पोर्टिंग इव्हेंट, फूड फेस्टिव्हल किंवा रिसॉर्टदेखील पर्यटकांसाठी प्रवासाचं कारण बनू शकतात. म्हणजेच आधी डेस्टिनेशन ठरवण्याऐवजी, आपल्याला काय अनुभवायचं आहे हे निवडायचं आणि त्यासाठी कुठे जायचं हे ठरवायचं—असा Gen Z च्या ट्रॅव्हलिंगचा नवा फंडा दिसत आहे.