बेली बटनमध्ये रिंग घालणे सुरक्षित आहे का? वेगाने वाढणाऱ्या फॅशन ट्रेंडमध्ये ‘या’ चुका करू नका
वेगाने वाढणाऱ्या फॅशन ट्रेंडमध्ये बेली बटनमध्ये रिंग घालणे हा एक महत्त्वाचा भाग बनला आहे. पण हा ट्रेंड सुरक्षित आहे का? याची किंमत किती येते आणि कोणती खबरदारी घ्यावी? या सर्व प्रश्नांची उत्तरे आणि महत्त्वाच्या टिप्स जाणून घेण्यासाठी वाचा सविस्तर.
फॅशनची दुनिया सतत नवनवीन ट्रेंड्स स्वीकारत असते आणि जुन्या ट्रेंड्सना पुन्हा बाजारात आणत असते. सध्या वेगाने उदयास येत असलेला एक असाच ट्रेंड म्हणजे ‘बेली बटन फॅशन’, म्हणजेच नाभीला आकर्षक बनवणारी स्टाइल. महिलांसाठी नाभी नेहमीच बोल्डनेस आणि स्टाइलचे प्रतीक राहिली आहे. विशेषतः तरुण मुलींमध्ये आणि सोशल मीडियावर सक्रिय असणाऱ्या ‘इन्फ्लुएन्सर्स’मध्ये नाभीमध्ये रिंग घालण्याचा हा ट्रेंड खूप लोकप्रिय झाला आहे.
बेली बटन फॅशनची वाढती लाट:
या बेली बटन फॅशनची सुरुवात पॉप कल्चरमधून मानली जाऊ शकते. ९० च्या दशकात करिश्मा कपूर, रवीना टंडन आणि शिल्पा शेट्टी यांसारख्या बॉलिवूड अभिनेत्रींनी क्रॉप टॉप्स किंवा लो-वेस्ट साड्या परिधान करून नाभीला ग्लॅमरचा भाग बनवले होते. त्यानंतर हॉलिवूडमध्ये ब्रिटनी स्पीयर्स आणि क्रिस्टीना एग्युलेरासारख्या पॉप सिंगर्सनी हा ट्रेंड जागतिक स्तरावर नेला. आजचे डिझायनर्स असे कपडे डिझाइन करतात, जे नाभीला केंद्रस्थानी ठेवतात – जसे की क्रॉप टॉप्स, ब्रालेट्स, ट्यूब टॉप्स आणि लो-वेस्ट पॅन्ट्स. हे कपडे केवळ पार्टी किंवा कॅज्युअल लुकमध्ये ट्रेंडी दिसत नाहीत, तर आत्म-अभिव्यक्तीचे माध्यमही बनले आहेत. ‘मेट गाला’पासून ते कॉलेज फेस्टपर्यंत, बेली बटनमध्ये रिंग घालणे एक सामान्य फॅशन म्हणून पाहिले जाऊ लागले आहे.
पियर्सिंग आणि टॅटूचा वाढता कल:
या ट्रेंडला आणखी पुढे नेण्यासाठी मुली नाभीवर ‘पियर्सिंग’ (Piercing) करतात किंवा टॅटू काढतात. ही ‘बॉडी ज्वेलरी’ (शरीरावरील दागिने) नाभीला अधिक आकर्षक बनवते, जी अनेकदा लो-वेस्ट कपड्यांसोबत खूप छान दिसते. बेली पियर्सिंग आता केवळ फॅशन नसून, आत्म-अभिव्यक्तीचे एक साधन बनले आहे. इंस्टाग्राम, स्नॅपचॅट आणि टिकटॉकसारख्या प्लॅटफॉर्मवर नाभीला फ्लॉन्ट करणे एक ट्रेंड बनले आहे. रील्समध्ये क्रॉप टॉप घालून डान्स करणे किंवा बिकिनी लुकमध्ये नाभी दाखवणे हे एक स्टाइल स्टेटमेंट बनले आहे. यामुळे युवा पिढीमध्ये ही फॅशन अधिक वेगाने पसरत आहे.
स्वच्छता आणि सुरक्षितता आहे महत्त्वाची:
बेली बटन फॅशन ट्रेंडी असली तरी, यासोबत स्वच्छता (Hygiene) राखणे अत्यंत आवश्यक आहे. जर तुम्ही पियर्सिंग केली असेल, तर नियमित स्वच्छता, ‘अँटीसेप्टिक’चा वापर करणे आणि घट्ट कपडे घालणे टाळणे महत्त्वाचे आहे, जेणेकरून संसर्ग (इन्फेक्शन) होणार नाही. अस्वच्छतेमुळे गंभीर समस्या उद्भवू शकतात.
भारतात नाभी पियर्सिंगचा खर्च किती?
भारतात नाभी (बेली बटन) पियर्सिंग करण्याचा खर्च साधारणपणे ₹2000 ते ₹7000 पर्यंत येतो. जर तुम्ही दिल्ली, मुंबई किंवा बंगळूरुसारख्या मोठ्या शहरांमध्ये एखाद्या चांगल्या आणि स्वच्छ ‘पियर्सिंग स्टुडिओ’मधून ते करून घेतल्यास, खर्च ₹2500 किंवा त्याहून अधिक असू शकतो. पण जर तुम्ही एखाद्या छोट्या पार्लरमधून किंवा स्वस्त ठिकाणाहून करत असाल, तर हा खर्च ₹500 ते ₹1000 मध्येही होऊ शकतो. परंतु एक गोष्ट लक्षात ठेवा, स्वस्त ठिकाणी स्वच्छतेची आणि सुरक्षेची योग्य काळजी घेतली जात नाही, ज्यामुळे संसर्ग होण्याचा धोका वाढतो. त्यामुळे, थोडे जास्त पैसे देऊन एखाद्या विश्वसनीय ठिकाणाहून पियर्सिंग करणे अधिक सुरक्षित आणि चांगले ठरते.
( डिस्क्लेमर : या आर्टिकलमध्ये देण्यात आलेली माहिती व उपाय हे सामान्य ज्ञानावर आधारित आहेत. आमचा याला दुजोरा नाही. ते अवलंबण्यापूर्वी तज्ज्ञांचा सल्ला जरूर घ्यावा.)
