Amravati : खासदार कार्यालय केले सील; बाहेर प्रशासनाचा कडा पहारा; अमरावतीत चाललंय तरी काय?
Amaravati MP Office Sealed : लोकसभा निवडणुकीपूर्वीपासून अमरावती राज्याच्याच नाही तर देशाच्या नकाशावर आले आहे. आता खासदार कार्यालयाचा ताबा मिळविण्यावरुन मोठा गदारोळ उठला आहे.
अमरावतीमध्ये गेल्या दोन दिवसांपासून खासदार कार्यालयाच्या ताब्यावरुन हायहोल्टेज ड्रामा सुरु आहे. भाजप आणि काँग्रेस या वादात प्रशासन आणि पोलीस मात्र चांगलेच जेरीस आले आहेत. खासदार जनसंपर्क कार्यालयाला आता प्रशासनाने पुन्हा सील ठोकले आहे. तर बाहेर पोलीस तैनात करण्यात आले आहे. एका कार्यालयावर दोन खासदारांनी दावा सांगितल्याने हा ड्रामा सुरु झाला आहे.
खासदार, आमदारांसह पदाधिकाऱ्यांवर गुन्हा
अमरावती जिल्हाधिकारी कार्यालयातील खासदार जनसंपर्क कार्यालयाचे कुलूप तोडून प्रवेश करणे काँग्रेसला भोवले. खासदार बळवंत वानखडे, आमदार यशोमती ठाकूर यांच्यासह काँग्रेसच्या 15 ते 20 पदाधिकाऱ्यांवर गुन्हे दाखल करण्यात आले आहेत. काल खासदार कार्यालयाचा ताबा घेण्यासाठी खासदार बळवंत वानखडे आणि यशोमती ठाकूर यांच्यासह पदाधिकाऱ्यांनी खासदार कार्यालयाचे कुलुप तोडले होते.
कार्यालय एक, खासदार दोन
पराभूत झाल्यानंतर 19 तारखेला नवनीत राणा यांनी जिल्हाधिकारी कार्यालयात असलेल्या कार्यालयाचा ताबा जिल्हाधिकारी कार्यालयाला सोपविला, त्याच दिवशी भाजपचे राज्य सभेचे खासदार अनिल बोंडे यांनी कार्यालय देण्याची मागणी केली होती. यशोमती ठाकूर, बळवंत वानखडे यांनी आज जिल्हाधिकारी कार्यालयातील खासदार कार्यालय कुलूप तोडून काल ताब्यात घेतले होते. काँग्रेसने ताब्यात घेतलेले खासदार कार्यालय जिल्हाधिकारी कार्यालयाकडून पुन्हा सील करण्यात आले.
पुन्हा वादाची शक्यता
यावेळी यशोमती ठाकूर चांगल्याच आक्रमक झाल्या होत्या. आता पुन्हा सील केल्याने पुन्हा वाद होण्याची शक्यता आहे. जिल्हाधिकारी कार्यालयाने हे खासदार कार्यालय अजून कोणालाही दिले नाही. त्यामुळे काँग्रेसने कुलूप तोडून ताबा घेतला होता. अमरावती मतदार संघ खेचून आणल्यानंतर काँग्रेसचे आक्रमक रुप सर्वांनीच पाहिले. त्यामुळे विधानसभेपूर्वी या ना त्या कारणांनी अमरावती राज्याच्या नकाशावर असेल, हे वेगळं सांगायला नको.
नवनीत राणा यांची भूमिका काय
नवनीत राणा यांनी जिल्हाधिकाऱ्यांना खासदार जनसंपर्क कार्यालय परत करत असल्याचे पत्र दिले. काँग्रेसचे नवनिर्वाचित खासदार बळवंत वानखेडे यांना हे कार्यालय देण्याचे त्यांनी पत्रात नमूद केले होते. त्यांनी वानखेडे यांना विजयी झाल्याबद्दल शुभेच्छा पण दिल्या. जिल्हाधिकारी कार्यालय परिसरातील खासदार जनसंपर्क कार्यालय हे जिल्ह्यातील शेतकरी, शेतमजूर आणि सर्व सामान्य जनतेसाठी आहे. त्यामुळे ते नवनिर्वाचित खासदाराला देण्याचे म्हणणे त्यांनी मांडले.
