Amravati Ambulance | अमरावतीत रुग्णवाहिका दिवसभर भक्तांच्या सेवेत!; रुग्णांसाठी नव्हे मेळघाटात ॲम्बुलन्स नवसासाठी
मेळघाटात गर्भवती व इतर अपघाती रुग्णांना रुग्णवाहिका मिळत नसल्याचे वास्तव चित्र आहे. सतत त्याची ओरड सुरू असते. परंतु अतिदुर्गम असलेल्या हतरू प्राथमिक आरोग्य केंद्रातील रुग्णवाहिका आपल्या कार्यक्षेत्रात बाहेरील कोयलारी येथील सोमेश्वर भोले मंदिरात नवसाच्या पूजेसाठी भक्तांना घेऊन आली होती.
अमरावती : अमरावती जिल्ह्यातील मेळघाटात हा अतिदुर्गम भाग. चिखलदरा तालुक्यातील हतरू प्राथमिक आरोग्य केंद्रात (Primary Health Center) भलतचं प्रकरण उघडकीस आलं. या आरोग्य केंद्रातील रुग्णवाहिका थेट 45 किलोमीटर अंतरावरील जंगलात दिसली. तिही नवसाच्या पूजेला दिवसभर भक्तांना घेऊन गेली होती. ही धक्कादायक प्रकार उघडकीस आला. त्यामुळे आरोग्य यंत्रणेची लक्तरे वेशीवर टांगली गेली आहेत. अॅम्ब्युलन्सचं काम रुग्णांना नेण्याचं असते. पण, येथे रुग्ण वाहून नेले गेले नाही. त्याऐवजी चक्क नवसासाठी अॅम्बुलन्सचा वापर केला गेला. यासंदर्भात संबंधित डॉक्टरला (Doctor) विचारणा करण्यात आले. तेव्हा ते म्हणतात, ती गाडी गॅरेजमध्ये ब्रेक नादुरुस्त असल्याने ठेवली होती. दुरुस्तीसाठी उभी होती. नवसाला कशी गेली माहीत नाही. या प्रकरणी जिल्हा आरोग्य अधिकारी डॉ. दिलीप रनमले (Dr. Dilip Ranmale) यांनी चौकशीचे आदेश दिले आहेत. चौकशी अंती दोषीवर कठोर कारवाई करू अशी माहिती रनमले यांनी दिली.
रुग्णवाहिका सोमेश्वर भोले मंदिरात
मेळघाटात गर्भवती व इतर अपघाती रुग्णांना रुग्णवाहिका मिळत नसल्याचे वास्तव चित्र आहे. सतत त्याची ओरड सुरू असते. परंतु अतिदुर्गम असलेल्या हतरू प्राथमिक आरोग्य केंद्रातील रुग्णवाहिका आपल्या कार्यक्षेत्रात बाहेरील कोयलारी येथील सोमेश्वर भोले मंदिरात नवसाच्या पूजेसाठी भक्तांना घेऊन आली होती. या मंदिरात रुग्णवाहिका दर्शन घेण्यासाठी तर आली नव्हती, असा प्रश्न विचारला जात आहे. पण, हे दर्शन घेणारे कोणते व्हीआयपी होते. याचा शोध चौकशीनंतरच लागेल. पण, चक्क रुग्णवाहिका नवसाला गेल्याने अंधश्रद्धेच्या जोखडातून मेळघाट केव्हा निघेल हा खरा प्रश्न आहे.
रुग्णांना वेळेवर मिळत नाही रुग्णवाहिका
मेळघाटात अंधश्रद्धा मोठ्या प्रमाणात आहे. त्यामुळं डॉक्टरपेक्षा काही लोक नवस, उपास-तापास यांना महत्त्व देतात. रुग्णांना नेण्यासाठी वेळेवर रुग्णवाहिका मिळत नाही. पण, हीच रुग्णवाहिका नवसाच्या कार्यक्रमासाठी भक्तांच्या सेवेत होती. त्यामुळं रुग्णवाहिकेचं काम काय, रुग्णांसाठी की, नवसासाठी असा प्रश्न निर्माण होत आहे. जिल्हा आरोग्य अधिकाऱ्यांनी याची गंभीर दखल घेतली आहे. चौकशीचे आदेश दिले. यात कोण दोषी आहे. ही रुग्णवाहिका रुग्णांना सोडून नवसाला कुणाच्या सांगण्यावरून गेली. चालकाने अशी चालाखी कशी केली, या सर्व प्रश्नांची उत्तर मिळणार आहेत.
