कृष्णा आंधळेंच तृतीयपंथीयांसोबत कनेक्शन? मोठी बातमी समोर

मोठी बातमी समोर येत आहे, आज सामाजिक कार्यकर्त्या तृप्ती देसाई यांनी मस्साजोगमध्ये जाऊन संतोष देशमुख यांच्या कुटुंबीयांची भेट घेतली, त्यानंतर त्यांनी प्रसारमाध्यमांशी संवाद साधला. यावेळी बोलताना त्यांनी या प्रकरणातील फरार आरोपी कृष्णा आंधळेबाबत मोठा गौप्यस्फोट केला आहे.

नेमकं काय म्हणाल्या तृप्ती देसाई? 

मध्यंतरी मला एक फोन आला होता, कृष्णा आंधळे हा  महाराष्ट्र आणि कर्नाटक बॉण्ड्री वर तृतीयपंथीयांच्या वेशात असू शकतो असं समोरच्या व्यक्तीनं मला सांगितलं. त्यांनी मला हेही सांगितलं की बीड जिल्ह्यातल्या  अनेक तृतीयपंथीयांसोबत त्याचे चांगले संबंध होते. त्यामुळे निश्चितच तृतीयपंथीयांसोबत त्यांचा वेश धारण करून एखाद्या वस्तीमध्ये तो तिथे असू शकतो आणि ते आपण पोलिसांना सांगावं असा मला फोन आला होता.  मात्र त्यामध्ये कितपत सत्य आहे की नाही यामुळे मी तातडीने त्या संदर्भात कोणाशी बोलले नव्हते, असं तृप्ती देसाई यांनी म्हटलं आहे.

दरम्यान पुढे बोलताना त्या म्हणाल्या की, मी देशमुख कुटुंबातील सगळ्यांना भेटले त्यांचं एकच म्हणणं आहे, त्यांना तातडीनं न्याय मिळाला पाहिजे. आईने तर मला सांगितलं की जसं माझ्या मुलाला तडफडून मारलं तसं कायद्यानुसार माझ्यासमोर आरोपींना देखील तडफडून मारलं पाहिजे. राज्यामध्ये अशा घटना होतात, त्या मीटवल्या जातात, लपवलल्या जातात. सत्तेच्या माजावर, पैशाच्या माजावर मात्र हे प्रकरण सगळ्यांनी उचलून धरलं म्हणून हे प्रकरण इथपर्यंत पोहोचलं आहे. फास्टट्रॅक कोर्टात सुद्धा अनेक केसेस जातात मात्र वर्षानुवर्षे त्यांना न्याय मिळत नाही, मात्र या प्रकरणात लवकरात लवकर न्याय मिळाला पाहिजे आणि आरोपींना फाशी झाली पाहिजे.

पुढे बोलताना त्या म्हणाल्या की, वाल्मीक कराड 15 आणि 16 डिसेंबरला दिंडोरीचं जे गुरुपीठ आहे अण्णासाहेब मोरे यांचं तिथे मुक्कामाला होता. त्याबरोबर विष्णू चाटे सुद्धा होता हे दोघेही तिथे राहिले आहेत, त्यांना व्हीआयपी वागणूक व्हीआयपी जेवण दिलं गेल आहे. त्यांना माहीत होतं. खंडणीतील आरोपी आहेत, हत्येतील आरोपी आहेत तरीसुद्धा मुद्दामून त्यांना तिथे ठेवलं गेलं असा आरोपीही त्यांनी यावेळी केला.