मनोज जरांगे पाटलांकडून आता मोठी मागणी, सरकारला 10 दिवसांचा अल्टिमेटम, ..तर संपूर्ण राज्य बंद करण्याचा इशारा

मालेगावमधून एक धक्कादायक घटना समोर आली आहे,  मालेगावमध्ये एका अल्पवयीन मुलीवर अत्याचार करून, दगडाने तिचं डोकं ठेचून हत्या करण्यात आली, या घटनेनं राज्यभरात खळबळ उडाली असून, संताप व्यक्त करण्यात येत आहे, आरोपीला फाशीची शिक्षा देण्यात यावी अशी मागणी होत आहे. दरम्यान आज मराठा आरक्षण आंदोलक मनोज जरांगे पाटील यांनी पीडित कुटुंबाची भेट घेतली आहे. यावेळी पीडितेच्या वडिलांनी आपली व्यथा मनोज जरांगे पाटील यांच्यासमोर मांडली, आरोपीला फाशीची शिक्षा द्यावी अशी मागणी कुटुंबाकडून करण्यात आली आहे. या भेटीनंतर माध्यमांशी बोलताना आता मनोज जरागे पाटील यांनी मोठी मागणी केली आहे. मुख्यमंत्री, महोदय दोन महिन्याच्या आत कायदा करा आणि आरोपीला फाशी द्या, नाहीतर त्याचा  एन्काऊंटर करा अशी मागणी यावेळी मनोज जरांगे पाटील यांनी केली आहे.

नेमकं काय म्हणाले मनोज जरांगे पाटील? 

मुख्यमंत्री, महोदय दोन महिन्याच्या आत कायदा करा, आणि आरोपीला फाशी द्या, नाहीतर त्याचा एन्काऊंटर करा. लाडकी लेक म्हणतात, लाडकी बहीण म्हणतात तर त्यांना न्याय द्या. न्याय देता येत नसेल तर तुमचे तोंड काळे करा.  दोन महिन्याच्या आत न्याय न दिल्यास संपूर्ण महाराष्ट्र रस्त्यावर उतरल्याशिवाय राहणार नाही, असा थेट इशाराच यावेळी मनोज जरांगे पाटील यांनी दिला आहे. पुढे बोलताना ते म्हणाले की, कायद्यात बदल करा, काहीही करा, पण न्याय द्या.  येत्या मंगळवारी कॅबिनेट बैठकीमध्ये कायद्यात दुरुस्ती करा, बाल लैंगिक सुधारणा कायद्यात दुरुस्ती करा, पीडितेच्या नावाने कायदा करा.  या प्रकरणात उज्वल निकम यांची वकील म्हणून नियुक्ती करा, अशी मोठी मागणी या प्रकरणात जरांगे पाटील यांनी केली आहे.

महिन्याच्या आत चार्जशीट दाखल करा, आणि त्या आरोपीला फाशीची शिक्षा द्या. न्याय न दिल्यास तुम्ही निर्दयी मुख्यमंत्री आहात असं आम्ही समजू,  मालेगाव, नाशिकसह संपूर्ण राज्य बंद करणार आणि पीडित कुटुंबाला न्याय मिळवून देणार असंही यावेळी जरांगे पाटील यांनी म्हटलं आहे. दरम्यान पीडित कुटुंबियांनी दहा दिवसांची मुदत सरकारला दिली आहे. अकराव्या दिवशी जर मला बोलावले तर त्या कुटुंबासाठी मी केव्हाही रस्त्यावर उतरेल. कुटुंबीयांशी चर्चा करताना काही मागण्या आम्ही कागदावर नोट केल्या आहेत,  त्या सर्व मुख्यमंत्र्यांकडे पाठवू आणि आरोपीला फाशीची शिक्षा देवू, असं जरांगे पाटील यांनी म्हटलं आहे.