आता बस्स! कुठल्याही व्यासपीठावर या.., असीम सरोदेंकडून विधानसभा अध्यक्ष राहुल नार्वेकरांना ओपन चॅलेंज
सध्या शिवसेना पक्षाचं नाव आणि चिन्ह कोणाचं यावर सुप्रीम कोर्टात सुनावणी सुरू आहे. या सर्व पार्श्वभूमीवर आता ज्येष्ठ वकील असीम सरोदे यांनी थेट विधानसभेचे अध्यक्ष राहुल नार्वेकर यांना चॅलेंज केलं आहे.
शिवसेना पक्ष आणि चिन्ह कोणाचं यावर सध्या सुप्रीम कोर्टामध्ये सुनावणी सुरू आहे. आज देखील या प्रकरणावर सुप्रीम कोर्टामध्ये युक्तीवाद होणार आहे. या सर्व पार्श्वभूमीवर विधानसभेचे अध्यक्ष राहुल नार्वेकर यांनी मोठं विधान केलं होतं. ‘मी दिलेला निर्णय हा अत्यंत शाश्वत असून, त्यात कोणताही बदल होईल असं मला वाटत नाही. मी घेतलेली भूमिका, आणि दिलेला निर्णय हा कायद्याच्या चौकटीत राहून घेतला आहे,’ असं राहुल नार्वेकर यांनी म्हटलं होतं. राहुल नार्वेकर यांच्या या विधानानंतर आता ज्येष्ठ वकील असीम सरोदे यांनी थेट राहुल नार्वेकर यांना ओपन चॅलेंज दिलं आहे. ‘राहुल नार्वेकर स्वतः वकील आहेत. त्यांना माझे जाहीर आव्हान आहे, त्यांना ज्या वकिलांचा सल्ला घेऊन यायचे आहे त्यांनी यावे,महाराष्ट्रातील कोणत्याही शहरात माझ्याशी कायदेशीर जाहीर वादविवाद ठेवावा आणि त्यांचे म्हणणे लोकांना पटवून द्यावे. ‘ असं ट्विट सरोदे यांनी केलं आहे.
नेमकं काय म्हणाले सरोदे?
‘राहुल नार्वेकर यांना शाश्वत शब्दाचा अर्थ तरी कळतो का? विधानसभा अध्यक्ष म्हणून राहुल नार्वेकर यांनी दिलेला निर्णय संपूर्णपणे बेकायदेशीर आहे हे मी वारंवार सांगतोय आणि सांगत राहील. सरन्यायाधीश धनंजय चंद्रचूड यांच्यासह इतर चार न्यायाधीशांनी दिलेल्या न्यायनिर्णयाच्या अनेक पानांवर राहुल नार्वेकर यांनी दिलेल्या बेकायदेशीर व घटनाबाहय निर्णयांचे उल्लेख आहेत. कपिल सिब्बल केवळ कुणा पक्षकारांची बाजू मांडत नाहीयेत तर संविधान व लोकशाहीची बाजू मांडत आहेत. पण संविधानाशी बेईमानी करून या देशाचा व डॉ. बाबासाहेब आंबेडकरांचा अपमान करणाऱ्या सत्तालोलुप लोकांना ते समजून घेताच येणार नाही. राहुल नार्वेकर स्वतः वकील आहेत. त्यांना माझे जाहीर आव्हान आहे, त्यांना ज्या वकिलांचा सल्ला घेऊन यायचे आहे त्यांनी यावे,महाराष्ट्रातील कोणत्याही शहरात माझ्याशी कायदेशीर जाहीर वादविवाद ठेवावा आणि त्यांचे म्हणणे लोकांना पटवून द्यावे. अहो नार्वेकर साहेब किती नुकसान करणार लोकशाही यंत्रणांचे ? आता बस्स !’ असं ट्विट सरोदे यांनी केलं आहे.
राहुल नार्वेकर यांना शाश्वत शब्दाचा अर्थ तरी कळतो का?
विधानसभा अध्यक्ष म्हणून राहुल नार्वेकर यांनी दिलेला निर्णय संपूर्णपणे बेकायदेशीर आहे हे मी वारंवार सांगतोय आणि सांगत राहील. सरन्यायाधीश धनंजय चंद्रचूड यांच्यासह इतर चार न्यायाधीशांनी दिलेल्या न्यायनिर्णयाच्या अनेक पानांवर… https://t.co/B4cwgQh5lY
— Asim Sarode (@AsimSarode) August 19, 2026
आज पुन्हा सुनावणी
दरम्यान आज पुन्हा एकदा शिवसेना पक्ष आणि चिन्ह कोणाचं? यावर सुनावणी पार पडणार आहे. ज्येष्ठ वकील कपील सिब्बल यांनी आतापर्यंत शिवसेना ठाकरे गटाच्या वतीने बाजू मांडताना जोरदार युक्तिवाद केल्याचं पहायला मिळालं आहे.
