लाडकी बहीण योजना किती दिवस सुरु राहणार? देवेंद्र फडणवीस यांच्याकडून महिलांना खूशखबर

महायुतीचा नाशिकमध्ये कार्यक्रम पार पडला. या कार्यक्रमाला मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि उपमुख्यमंत्री अजित पवार उपस्थित होते. या कार्यक्रमात भाषण करताना देवेंद्र फडणवीस यांनी राज्यातील महिलांना खूशखबर दिली. राज्य सरकारकडून अडीच लाखांपेक्षा कमी वार्षिक उत्पन्न असलेल्या कुटुंबातील महिलांसाठी लाडकी बहीण योजना सुरु करण्यात आली आहे. या योजनेच्या माध्यमातून लाभार्थी महिलांना दर महिन्याला 1500 रुपये आर्थिक मदत मिळणार आहे. याच योजनेबाबत देवेंद्र फडणवीस यांनी महिलांना उद्देशून महत्त्वाची माहिती दिली. लाडकी बहीण योजना किती दिवस सुरु राहणार याबाबत देवेंद्र फडणवीस यांनी माहिती दिली.

“आपण लाडकी बहीण योजना जेव्हा घोषित केली तेव्हा विरोधक म्हणायचे, फसवी योजना आहे. 10 टक्के महिलांनाही पैसे मिळणार नाही. मला सांगताना आनंद होतोय, पहिल्यात महिन्यात 1 कोटी पेक्षा जास्त महिलांच्या बँक खात्यात पैसे पोहोचले आणि उर्वरित सगळ्या महिलांच्या खात्यात पैसे जाणार, एकही बहीण वंचित राहू देणार नाही. सगळ्या बहिणींच्या खात्यात पैसे जाणार. दर महिन्याला आणि वर्षानुवर्षे महिलांच्या बँक खात्यात पैसे जाणार. तुमचा आशीर्वाद आमच्या पाठीशी आहे तोपर्यंत ही योजना कुणीच बंद करु शकत नाही”, अशी महत्त्वाची माहिती देवेंद्र फडणवीस यांनी दिली.

‘विरोधकांच्या पोटात गोळा उठलाय’

“आमच्या विरोधकांच्या पोटात इतका गोळा उठलाय. ते म्हणतात, 1500 रुपये देवून तुम्ही त्या ठिकाणी महिलांना खरेदी करता का, महिलांना लाच देता का? अरे वेड्यांनो बहिणीचं आणि आईचं प्रेम कुणीच खरेदी करु शकला नाही. प्रत्यक्ष इश्वरदेखील उतरला आणि म्हटलं बहिणीचं प्रेम खरेदी करतो, पण ते खरेदी करता येत नाही. हे अनमोल प्रेम आहे”, असं देवेंद्र फडणवीस म्हणाले.

“आमच्या बहिणींचं प्रेम मिळतंच, आमचा प्रयत्न आहे, त्या बहिणींना आम्ही ओवाळणी द्यावी तरी त्या प्रेमामध्येच राहायचं आहे. जे लोकं सोन्याचा चमचा घेऊन जन्माला आले त्यांना 1500 रुपयांचा मोल समजणार नाही. माझी जी मायमाऊली महिन्याचा हिशोब करताकरता तिच्या डोळ्यांतून पाणी येते त्या मायमाऊलीसाठी ही योजना आणली आहे”, असं देवेंद्र फडणवीस म्हणाले.