भीमनवार यांचा राजीनामा होणार? देवेंद्र फडणवीसांची तयारी पण…मुख्यमंत्र्यांचं सर्वात मोठं विधान, समोर ठेवली एक अट!
आता पूर्णपणे बेकायदेशीर आंदोलन सुरू करण्यात आले आहे. राज्य सरकारने विद्यार्थीनिष्ट भूमिका घेतली. पेपरफुटी झाली तेव्हा भीमनवार हे एमपीएससीचे अध्यक्ष नव्हतेच, असे देवेंद्र फडणवीस म्हणाले आहेत.
Pune MPSC Protest : सध्या पुण्यात एमपीएससी विद्यार्थ्यांचे आंदोलन सुरू आहे. या आंदोलनात शेकडो विद्यार्थ्यांनी सहभाग घेतलेला आहे. विशेष म्हणजे अनेक बड्या नेत्यांनी आंदोलनस्थळी जात आपण विद्यार्थ्यांसोबत आहोत, असं सांगितलंय. या आंदोलनाचे नेतृत्त्व आमदार राहुल गांधी करत आहेत. काहीही झालं तरी नैतिकतेच्या मुद्द्यावरून एमपीएससी आयोगाच्या अध्यक्षांनी राजीनामा द्यावा अशी मागणी या विद्यार्थ्यांकडून केली जातेय. असे असतानाच आता मुख्यमंत्री देवेंद्र फडणवीस यांनी या आंदोलनाबाबत मोठं विधान केलंय. विशेष म्हणजे एक अट समोर ठेवून त्यांनी एमपीएससीचे अध्यक्ष बदलण्याची शिफारस करण्यास तयार असल्याचे त्यांनी सांगितले आहे.
देवेंद्र फडणवीस यांनी दिल्लीत केंद्रीय गृहमंत्री अमित शाह यांची भेट घेतली. या भेटीनंतर त्यांनी दुष्काळ तसेच इतर काही मुद्द्यांवर भाष्य केलं. यावेळी त्यांनी पुण्यातील विद्यार्थ्यांच्या आंदोलनावरही भूमिका व्यक्त केली. पुण्याच्या आंदोलनात काही राजकीय विद्यार्थी असले तरीही काही विद्यार्थीही आहेत. त्यामुळे हे आंदोलन संयमाने हाताळण्याचाच पोलिसांचा पवित्रा आहे. 15 लोकांचे शिष्टमंडळ आमच्याकडे आले होते. या शिष्टमंडळाने एकूण पाच मागण्या केल्या होत्या. त्यातील पहिली मागणी ही एमपीएससीच्या अध्यक्षांना पदावरून दूर करणे, त्यांच्यावर कायदेशीर कारवाई करणे अशी होती. यावेळी एमपीएससीच्या अध्यक्षांना हटवण्याचा अधिकार हा केवळ राष्ट्रपतींकडे आहे. राष्ट्रपती सर्वोच्च न्यायालयाला सांगतात. सर्वोच्च न्यायालय चौकशी करतं त्यानंतर राष्ट्रपती एमपीएससीच्या अध्यक्षांना काढू शकतात, हे आम्ही शिष्टमंडळाला सांगितले होते. तुम्ही म्हणत असाल तर आम्ही न्यायालयीन चौकशी कराला तयार आहोत, असं आम्ही त्या शिष्टमंडळाला सांगितले होते. त्यावेळी शिष्टमंडळाने मागण्या मान्य झाल्याचे पत्र त्यांनी मागितले होते. त्यानंतर हे आंदोलन मागे घेण्यात आले होते.
आता पूर्णपणे बेकायदेशीर आंदोलन सुरू करण्यात आले आहे. राज्य सरकारने विद्यार्थीनिष्ट भूमिका घेतली. पेपरफुटी झाली तेव्हा भीमनवार हे एमपीएससीचे अध्यक्ष नव्हतेच. राज्य सरकारने भीमनवार यांची चौकशी करण्याचेही मान्य केले. त्या पेपरफुटीत त्यांचा दुरान्वयानेही संबंध आला तर राज्य सरकार स्वत: अनुच्छेद 317 अंतर्गत शिफारस करून भीमनवार यांना अध्यक्षपदापासून दूर करायला सांगेल, असं आम्ही सांगितलेलं आहे. यापेक्षा सरकार वेगळी भूमिका काय घेऊ शकतं? असा सवालही फडणवीस यांनी केला.
