एकनाथ शिंदेंनी पेटारा उघडला, ठाकरेंच्या बंडखोर खासदारांना मोठं गिफ्ट, तातडीने विकास निधी…

Eknath Shinde : ठाकरे यांच्या शिवसेनेच्या सहा खासदारांनी बंडखोरी करत एकनाथ शिंदे यांच्या शिवसेनेत प्रवेश केला. या पक्षप्रवेशाचा जाहीर कार्यक्रम घेण्यात आला. यावेळी उपमुख्यमंत्री एकनाथ शिंदे उपस्थित होते. मतदारसंघाचा विकास आणि विकासनिधी या कारणामुळेच आम्ही पक्षांतर करत आहोत, असे या सहा खासदारांकडून सांगण्यात आले होते. दरम्यान, आता खासदारांनी प्रक्षप्रवेश करताच एकनाथ शिंदे यांनी पेटारा उघडला आहे. जे खासदार पक्षात आलेले आहेत, त्यांना भरघोस विकासनिधी दिला जाईल, असे शिंदे यांनी सांगितले आहे.

मला आताच दोन खासदार भेटले

एकनाथ शिंदे यांनी पत्रकारांनी विचारलेल्या काही प्रश्नांची उत्तरं दिली. यावेळी बोलताना आम्ही कोणतंही ऑपरेशन अर्धवट सोडत नाही. खासदारांचं ऑपरेशन टायगर यशस्वी झालं आहे. सगळ्या कायदेशीर, घटनात्मक प्रकिया पूर्ण झालेल्या आहेत, असे शिंदे यांनी सांगितले. सगळेच सहा खासदार आनंदी आहेत. मला आताच दोन खासदार भेटले आहेत. ते आता मूळ शिवसेनेत आले आहेत, असे म्हणत शिंदे यांनी ऑपरेशन टायगर यशस्वी ठरल्याचा पुनरुच्चार केला.

आलेल्या खासदारांच्या विभागात वेगाने विकास होईल

सहा खासदार आमच्या परिवारात आले आहेत. अगोदर आमच्याकडे सात खासदार होते. आता सहा खासदार आले आहेत. आमची टीम आता मोठी झाली आहे. राज्यसभेचे दोन खासदार आहेत. आता शिवसेना अधिक बळकट होईल. आलेल्या खासदारांच्या विभागात वेगाने विकास होईल, असा विश्वानस एकनाथ शिंदे यांनी व्यक्त केला.

निधी देण्याची तत्काळ सूचना केली

आजच आम्ही काही विभागांचा निधी, निधीचे प्रस्ताव आणायला सांगितले आहे. काही निधी त्यांना तत्काळ देण्याच्या सूचना मी दिलेल्या आहेत. मतदारसंघांचा विकास हाच आलेल्या खासदारांचा अजेंडा होता. या अजेंड्याला आम्ही आता सुरुवात केली आहे. एनडीएचीही ताकद वाढलेली आहे. डबल इंजिनच्या सरकारमध्ये हे सहा खासदार आले आहेत, असे म्हणत बंडखोरी केलेल्या खासदारांना आता विकासनिधी मोठ्या प्रमाणात उपलब्ध होईल, असे शिंदे यांनी सांगितले.