Gold Silver Rate Today | सोन्याने मोडले सर्व विक्रम; सुवर्णनगरीत 48 तासांत 2 हजारांनी वाढला भाव
Gold Silver Rate Today | सुवर्णनगरी जळगावमध्ये सोन्याच्या भावाने कहर केला आहे. सोन्याने सर्व विक्रम मोडीत काढले आहे. जीएसटीसह 24 कॅरेट सोने प्रतितोळा 66 हजार रुपयांच्या घरात पोहचले आहे. सोन्याच्या या हनुमान उडीने ग्राहकांच्या तोंडचे पाणी पळाले आहे.
किशोर पाटील, टीव्ही9 मराठी प्रतिनिधी,जळगाव | 7 March 2024 : सुवर्णनगरी जळगावमधील सराफा बाजारात सोने एकदम वधारले आहे. गेल्या 48 तासांत सोन्याने 2 हजारांची उडी घेतली. जीएसटीसह 24 कॅरेट सोने प्रतितोळा 66 हजार रुपयांच्या घरात पोहचले आहे. चालू आर्थिक वर्षाच्या अखेरच्या महिन्यात, मार्चमध्ये सोन्याने धुमाकूळ घातला आहे. लग्नसराई सुरु असतान सोन्याच्या या दमदार खेळीने ग्राहकांच्या खिशाला मोठी कात्री लागली आहे. मार्च महिन्यात सोन्याने एकदम उसळी घेतली आहे. सोने अजून 70 हजारांचा टप्पा गाठणार असल्याचा अंदाज व्यक्त होत आहे.
वर्षभरातील उच्चांक
जळगावच्या सराफा बाजारात सोन्याने वर्षभरातील नवीन उच्चांक गाठला. अवघ्या 48 तासांत भाव गगनाला भिडले. दोन हजारांची रेकॉर्डब्रेक चढाई सोन्याने केली आहे. आज, 7 मार्च रोजी सुवर्णनगरीत 64,500 रुपये असा सोन्याचा भाव आहे. जीएसटीसह सोन्याचे दाम 66 हजार रुपयांच्या घरात पोहचतात. त्यामुळे ऐन लग्नसराईत ग्राहकांच्या खिशावर ताण आला आहे. त्यांना आज अधिक पैसे मोजावे लागत आहे. जळगावात चांदीच्या भावात 700 रुपयांची घसरन होऊन ती 72 हजार 800 रुपये प्रति किलो वर आली.
14 ते 24 कॅरेटचा भाव काय
इंडियन बुलियन्स अँड ज्वेलर्स असोसिएशननुसार (IBJA), सोने आणि चांदी स्वस्त झाली. 24 कॅरेट सोने 64,493 रुपये, 23 कॅरेट 64,235 रुपये, 22 कॅरेट सोने 59,075 रुपये झाले.18 कॅरेट 48,369 रुपये, 14 कॅरेट सोने 37,728 रुपये प्रति 10 ग्रॅमवर पोहचले. एक किलो चांदीचा भाव 71,710 रुपये झाला. वायदे बाजारात आणि आंतरराष्ट्रीय बाजारात सोने आणि चांदीवर कुठलाही कर, शुल्क नसते. तर सराफा बाजारात शुल्क आणि कराचा समावेश होत असल्याने भावात तफावत दिसून येते.
हॉलमार्कनुसार कॅरेट
- भारतीय मानके संस्थेद्वारे शुद्ध सोन्यासाठी हॉलमार्क देण्यात येतो. 24 कॅरेट सोन्याच्या दागिन्यांवर 999, 23 कॅरेटवर 958, 22 कॅरेटवर 916 तर 21 कॅरेटवर 875 आणि 18 कॅरेटवर 750 अंकीत असते. अनेक ठिकाणी ग्राहक 22 कॅरेट आणि 24 कॅरेट सोन्याची आग्रहाने मागणी करतात.
- काही लोक 18 कॅरेट सोन्याचा वापर करतात. जेवढा कॅरेट सोने असेल, तेवढे सोने शुद्ध ठरते 24 कॅरेट सोने 99.9% शुद्ध असते. 22 कॅरेट सोने जवळपास 91 टक्के शुद्ध असते. 22 कॅरेट सोन्यात 9% इतर धातू असतात. दागिने तयार करण्यासाठी याचा वापर होतो. त्यात तांबे, चांदी, झिंक यांचा वापर करुन दागिने तयार करण्यात येतात. 24 कॅरेट सोने दमदार असते. पण त्याचा दागिने तयार करण्यासाठी वापर होत नाही.
