घाबरवायला गेला अन् गोळीच घातली, उमेदवाराचं काय झालं?; जळगावातील त्या घटनेने…

मुक्ताईनगरमधील राजकारण सध्या चांगलंच तापलं आहे. या मतदारसंघात महायुतीकडून सध्याचे विद्यमान आमदार चंद्रकांत पाटील यांना उमेदवारी देण्यात आली आहे. तर महाविकास आघाडीकडून आमदार एकनाथ खडसे यांच्या कन्या रोहिणी खडसे यांना उमेदवारी देण्यात आली आहे. तर विनोद सोनवणे हे तिसरे अपक्ष उमेदवार आहेत. त्यामुळे मुक्ताईनगरमध्ये तिरंगी लढत बघायला मिळत आहे. तीनही उमेदवारांकडून जोरदार प्रचार केला जातोय. पण मंगळवारी (5 नोव्हेंबर) एक धक्कादायक प्रकार बघायला मिळाला. तो प्रकार म्हणजे अपक्ष उमेदवार विनोद सोनवणे यांच्यावर दुचाकीवरुन आलेल्या 3 अज्ञातांनी गोळ्या झाडल्या. पण सुदैवाने ते बचावले. या घटनेनंतर आरोपी पळून गेले. यानंतर विनोद सोनवणे यांनी पोलीस ठाणे गाठत तक्रार दाखल केली. या घटनेची गंभीर दखल पोलिसांनी घेतली. पोलिसांनी या प्रकरणी 24 तासांच्या आत कारवाई करत 3 आरोपींना बेड्या ठोकल्या आहेत.

मुक्ताईनगरचे अपक्ष उमेदवार विनोद सोनवणे यांच्यावर काल झालेल्या गोळीबार प्रकरणातील पाच आरोपींपैकी तीन आरोपींना अटक करण्यात आली आहे. पोलिसांनी गुन्हाकरता वापरलेली पिस्तूल आणि गाडी जप्त केली आहे. या प्रकरणातील आणखी 2 आरोपी हे फरार आहेत. त्या दोनही आरोपींचा पोलिसांकडून शोध सुरु आहे. पोलीस लवकरच आरोपींचा शोध घेण्यात यशस्वी होण्याची शक्यता आहे. पण संबंधित घटनेमुळे जिल्ह्यात एकच खळबळ उडाली आहे. दरम्यान, जिल्हा पोलीस अधीक्षक महेश्वर रेड्डी यांनी या प्रकरणी पत्रकार परिषद घेत काय-काय कारवाई केली, याबाबतची माहिती दिली. तीन आरोपींना अटक करण्यात यश आल्याचं त्यांनी सांगितलं.

आरोपींनी गोळीबार का केला?

अपक्ष उमेदवार विनोद सोनवणे यांच्याकडे दोन महिन्यांपूर्वी काही जण आले. आमच्याकडे भरपूर लोक आहेत. निवडणुकीत इलेक्शनचं कॅम्पिंग करून मदत करू, असं सांगत त्यांनी अपक्ष उमेदवार सोनवणे यांच्याकडे पैशांची मागणी केली होती. पण सोनवणे यांनी पैसे न दिल्याने त्यांनी धाक दाखवण्याच्या उद्देशाने फायरिंग केल्याचे प्राथमिक चौकशीत निष्पन्न झाल्याची माहिती जिल्ह्याचे पोलीस अधीक्षक महेश्वर रेड्डी यांनी दिली.

आरोपींची कुठलीही राजकीय पार्श्वभूमी नसून गुन्हेगारी प्रवृत्तीची आहेत, अशी माहितीदेखील पोलीस अधीक्षक महेश्वर रेड्डी यांनी दिली. या प्रकरणी दोन राउंड फायर करण्यात आल्याची तक्रार आहे. पाच आरोपींपैकी दोन आरोपींनी अपक्ष उमेदवाराकडे पैशांची मागणी केली होती. निवडणुकीत काहीतरी पैसे भेटतील या उद्देशाने त्यांनी हा प्रकार केल्याची माहिती समोर येत आहे.