अपात्रतेच्या निकालापूर्वीच… कपिल सिब्बल यांचा जोरदार युक्तिवाद; थेट निवडणूक आयोगालाच धरलं धारेवर

सुप्रीम कोर्टात आज शिवसेना पक्ष आणि चिन्ह कुणाचं याबाबत सुनावणी सुरू आहे. काल शिवसेना ठाकरे गटाकडून ज्येष्ठ वकील कपिल सिब्बल यांनी युक्तिवाद केला होता. आज या सुनावणीचा दुसरा दिवस आहे. आजही सिब्बल यांनी युक्तिवाद सुरू केला आहे. आजच्या युक्तिवादात सिब्बल यांनी थेट निवडणुक आयोगालाच धारेवर धरलं आहे. निवडणूक आयोगाने शिंदे यांच्याकडे असलेल्या आमदारांच्या संख्येच्या आधारे चिन्ह दिलं असा युक्तिवाद केला आहे. सिब्बल यांनी कोर्टात नेमकं काय म्हटलं ते सविस्तर जाणून घेऊयात.

अपात्रतेच्या निकालापूर्वीच निवडणूक आयोगाने…

कपिल सिब्बल यांनी युक्तिवाद करताना म्हटले की, ‘माननीय न्यायमूर्तींनो, मी हे काहीशा संकोचाने मांडत आहे. अपात्रतेचा प्रश्न निकाली निघण्यापूर्वीच निवडणूक आयोगाने कोणता गट हा मूळ राजकीय पक्ष आहे, याचा निर्णय दिला, तर नेमकी हीच समस्या निर्माण होते. एकदा आयोगाने एखाद्या गटाला राजकीय पक्ष म्हणून मान्यता देऊन त्याला पक्षाचे निवडणूक चिन्ह बहाल केले, तर त्यानंतर अपात्रतेच्या याचिकांवर निर्णय झाला तरी त्याचा काहीच उपयोग राहत नाही; तोपर्यंत “घोडा तबेल्यातून निघून गेलेला असतो.”

पुढे बोलताना सिब्बल यांनी म्हटले की, ‘मी हाच युक्तिवाद घटनापीठासमोरही मांडला होता. अपात्रतेच्या कार्यवाहीचा निकाल लागेपर्यंत निवडणूक आयोगाने प्रतीक्षा करावी, अशी माझी विनंती होती. मात्र, स्पष्टपणे सांगतो की, पाच न्यायमूर्तींच्या घटनापीठाने हा युक्तिवाद स्वीकारला नाही. त्याचा परिणाम असा झाला की, अपात्रतेची कार्यवाही प्रलंबित असतानाच निवडणूक आयोगाने पक्षचिन्हाच्या वादावर निर्णय दिला. अपात्रतेच्या कार्यवाहीतील प्रत्युत्तरे 2023 मध्ये दाखल झाली; तोपर्यंत आयोगाने सर्व निर्णय आधीच दिले होते आणि त्यामुळे आज आम्ही या परिस्थितीत आहोत.’

पुढे बोलताना सिब्बल यांनी म्हटले की, ‘विधिमंडळ पक्ष फुटला म्हणून राजकीय पक्ष फुटला असं होतं नाही. संघटनास्तरावर उद्धव ठाकरेंकडे बहुमत होतं’ हेही कोर्टाच्या निदर्शनास आणून दिलं. सिब्बल यांनी केरळ कोर्टाच्या एका निकालाचा दाखला दिला. तसेच इंदिरा गांधी विरुद्ध ब्रह्मानंद रेड्डी केसचा दाखला देखील सिब्बल यांनी दिला आहे.