Ladki Baheen Yojana : मंत्रिमंडळाच्या पहिल्याच बैठकीतून लाडक्या बहिणींसाठी गुडन्यूज, डिसेंबरच्या हफत्याबाबत मोठी अपडेट

आज महायुती सरकारचा शपथविधी सोहळा पार पडला, या शपथविधी सोहळ्यात देवेंद्र फडणवीस यांनी मुख्यमंत्रिपदाची तर अजित पवार आणि एकनाथ शिंदे यांनी उपमुख्यमंत्रिपदाची शपथ घेतली. दरम्यान मंत्रिमंडळाचा शपथविधी होताच आज मंत्रालयात मंत्रिमंडळाची पहिली बैठक पार पडली. या बैठकीमध्ये काही मोठे निर्णय होणार का याकडे राज्याचं लक्ष लागलं होतं. या बैठकीनंतर मुख्यमंत्री देवेंद्र फडणवीस यांची पत्रकार परिषद पार पडली. या पत्रकार परिषदेमध्ये बोलताना देवेंद्र फडणवीस यांनी सरकारची भूमिका स्पष्ट केली. जरी आमची पदं बदलली असली तरी देखील काम करण्याची दिशा बदलणार नाही, असं फडणवीस यांनी म्हटलं. दरम्यान फडणवीस यांच्यानंतर लगेचच उपमुख्यमंत्री एकनाथ शिंदे यांची देखील पत्रकार परिषद पार पडली, या पत्रकार परिषदेमध्ये बोलताना एकनाथ शिंदे यांनी लाडकी बहिण योजनेबाबत महत्त्वाची माहिती दिली आहे.

राज्याच्या अंतरीम अर्थसंकल्पामध्ये लाडकी बहीण योजेनेची घोषणा करण्यात आली होती. या योजनेंतर्गत दर महिन्याला लाभार्थी महिलांच्या खात्यात 1500 रुपये जमा करण्यात येतात. जुलैपासून या योजनेचा लाभ महिलांना मिळत आहे. आतापर्यंत नोव्हेंबर महिन्यापर्यंतचे पैसे खात्यामध्ये जमा करण्यात आले आहेत. दरम्यान डिसेंबरचा हफ्ता कधी मिळणार याकडे आता सर्वांचं लक्ष लागलं आहे. या पत्रकार परिषदेमध्ये एकनाथ शिंदे यांना याबाबत प्रश्न विचारण्यात आला.

या प्रश्नाला उत्तर देताना शिंदे यांनी म्हटलं की, आजच आमची मंत्रिमंडळाची बैठक झाली. या बैठकीत आम्ही अधिकाऱ्यांना लाडकी बहीण योजनेबाबत सूचना केल्या आहेत. तातडीनं डिसेंबरचा हाफता हा लाभार्थी महिलांच्या खात्यात जमा झाला पाहिजे अशा सूचना आम्ही केल्या आहेत. आम्ही जे निर्णय घेतले ते फक्त कागदावरच राहिले नाहीत तर त्याची अंमलबजावणी देखील लगेचच केली. त्यामुळे आम्हाला पुन्हा जनतेचा एवढ्या मोठ्या प्रमाणात प्रतिसाद मिळाला. मी पूर्वी जेव्हा सीएम होता तेव्हा मी स्वत:ला मुख्यमंत्री नाही तर सीएम म्हणजे कॉमन मॅन समजायचो, आता उपमुख्यमंत्री आहे तर मी आता स्वत: डीसीएम अर्थात डेडिकेटेड कॉमन मॅन समजतो असंही यावेळी एकनाथ शिंदे यांनी म्हटलं आहे.