गावानं नाकारलं, देश स्वीकारणार, बारा मतदारांचे जाहीर आभार, लातूरच्या पठ्ठ्याचं बॅनर

लातूर : निवडणुकीत कमी मतं पडली, तर काही उमेदवारांना तोंड कुठे लपवू नि कुठे नको, असं होतं. मात्र लातूरचा पठ्ठ्या जिगरबाजच म्हणायला हवा, कारण अवघी 12 मतं पडूनही त्याने बॅनरबाजी केली. गावानं नाकारलं, समाजाने धिक्कारलं असेल, पण देश स्वीकारणार, असा जबरा कॉन्फिडन्सही त्याने व्यक्त केला. (Latur man puts banner to thank 12 voters in Gram Panchayat Election)

कोनाळी गावातील बॅनरची देशभर चर्चा

बारा मतं पडली, हे भर चौकात सांगायला हिंमत लागते. लातूर जिल्ह्यातल्या डोंगर-कोनाळी गावाच्या भर चौकात एक मंदिर आहे. या मंदिरावर लावलेलं बॅनर फक्त गावकऱ्यांचंच नाही, तर तमाम नेटिझन्सचं लक्ष वेधून घेत आहे. कारण हे बॅनर आहे बारा मतदारांचे जाहीर आभार मानणारं.

12 मतांची किंमत बाराशे मतांइतकी

लातूर जिल्ह्यातल्या डोंगर-कोनाळीतील ग्रामपंचायत निवडणुकीत विकास शिंदे कोनाळीकर रिंगणात उतरला होता. विकास एकटाच वॉर्डात अपक्ष उभा होता. त्याचं निवडणूक चिन्ह होतं शिट्टी. निवडणुकीत विकासला केवळ बारा मतं मिळाली. मात्र या 12 मतांची किंमत त्याच्या नजरेत बाराशे मतांइतकी आहे. म्हणूनच मतदारांचे आभार मानण्यासाठी त्याने बॅनर लावला.

विकास शिंदेने बॅनरवर काय लिहिलंय?

वाटलं होतं गड्या आपला गाव बरा… पण तुम्ही म्हणालो पसारा भरा, आम्ही जातो आमच्या गावा… आमचा राम राम घ्यावा समाजाने धिकारलं… गावानं नाकारलं.. पण आम्हाला देश स्वीकारणार… आमच्यावर जीवापाड प्रेम करणाऱ्या बारा मतदारांचे जाहीर आभार (Latur man puts banner to thank 12 voters in Gram Panchayat Election)

ना जातीसाठी… ना धर्मासाठी… आमचा लढा मातीसाठी… जगेन तर देशासाठी… मरेन तर देशासाठी… मला ज्यांनी बारा मते देऊन संघर्ष करण्याची ताकद दिली, त्यांचे सात जन्मही उपकार फिटणार नाहीत तुमच्या मताचं देशात नावच करीन

-खंडेराया नगरीचे पराभूत उमेदवार विकास शिंदे कोनाळीकर

दोन-चार मतांनी पडल्याने गावाला शिव्या घालत पाच वर्ष काढणारे शेकडो मिळतील, पण केवळ 12 मतं पडली म्हणून हिरमुसून न जाता गावाच्या चौकात बॅनर लावून 12 मतदारांचे आभार मानणारे विकासराव सध्या तरी एकटेच झळकत आहेत.

संबंधित बातम्या :

VIDEO | कुटुंबाच्या विरोधानंतरही ग्रामपंचायतीत बाजी, पठ्ठ्याचा शर्ट काढून दंड थोपटत जल्लोष

यशस्वी स्त्रीच्या मागे, खंबीर पुरुषाचाही हात असतो, महाराष्ट्रात व्हायरल होणाऱ्या फोटोमागची कहाणी!

(Latur man puts banner to thank 12 voters in Gram Panchayat Election)