बिहारमध्ये उभारणार महाराष्ट्र भवन, सामाजिक न्यायमंत्री संजय शिरसाट यांनी घेतील बिहारच्या मुख्यमंत्र्यांची भेट
महाराष्ट्र भवन बांधण्याबाबत आज बिहारमध्ये महत्वाची बैठक झाली असून त्याचा संपूर्ण खर्च महाराष्ट्र सरकार करणार असून जागा देण्याचे आश्वासन बिहाराचे मुख्यमंत्री सम्राट चौधरी यांनी दिले आहे.

महाराष्ट्रात अधूनमधून हिंदी आणि मराठी भाषिक वादाची भरती ओहोटी सुरु असते. त्याच देशातील इतर राज्यांना नवीमुंबईत त्याचे आसाम, बिहार भवन बांधण्यासाठी सढळहस्ते जमिनी मंजूर केल्या जात असतात. यावरुन मनसेचे अध्यक्ष राज ठाकरे सतत टीका करत असतात. अशात आता बिहारमध्ये आता महाराष्ट्र भवन उभारण्यासाठी जागा देण्याचे वचन बिहारचे मुख्यमंत्री सम्राट चौधरी यांनी दिले आहे.
राज्याचे सामाजिक न्याय मंत्री संजय शिरसाट यांनी बिहारचे मुख्यमंत्री सम्राट चौधरी यांची पाटणा येथे भेट घेतली आहे. त्यावेळी बिहारच्या मुख्यमंत्र्यांनी महाराष्ट्राचे मुख्यमंत्री देवेंद्र फडणवीस यांना कॉल केला.बिहारमध्यील बुद्धगया या ठिकाणी महाराष्ट्रातून येणाऱ्या पर्यटकांसाठी जलद गतीने दहा एकर जमिनीवर महाराष्ट्र भवन इमारत उभारण्याचे आश्वासन मुख्यमंत्री सम्राट चौधरी यांनी दिले आहे.
बिहारमधील बौद्धगया येथे महाराष्ट्र भवनासाठी 8 ते 10 एकर जमीन उपलब्ध करून देण्यात यावी अशा मागणीचे पत्र सामाजिक न्यायमंत्री संजय शिरसाट यांनी बिहारचे मुख्यमंत्री सम्राट चौधरी यांना दिले आहे. या महाराष्ट्र भवनाचा बांधण्याचा खर्च महाराष्ट्र शासनाकडून केला जाणार आहे. महाराष्ट्रातून बोधगयाला येणाऱ्या भाविक आणि पर्यटकांसाठी निवास, भोजन आणि सांस्कृतिक सुविधा उपलब्ध होणार आहे. या प्रकल्पासाठी महाराष्ट्राच्या सामाजिक न्याय विभागाला बिहार सरकारशी समन्वय साधण्याचे निर्देश देण्यात आले आहेत.
बिहारमधील बोधगया येथे महाराष्ट्र भवन उभारण्यासाठी सामाजिक न्यायमंत्री संजय शिरसाट यांनी बिहारचे मुख्यमंत्री सम्राट चौधरी यांना पत्र लिहिले आहे. बोधगया हे भगवान गौतम बुद्ध यांना ज्ञानप्राप्ती झाल्याचे पवित्र स्थळ असून, या ठिकाणाला ऐतिहासिक, सांस्कृतिक आणि आध्यात्मिक महत्त्व आहे. भारतरत्न डॉ. बाबासाहेब आंबेडकर यांचे बौद्ध चळवळीशी असलेले नाते लक्षात घेता, दरवर्षी महाराष्ट्रातून हजारो भाविक, पर्यटक आणि अभ्यासक बोधगयाला भेट देत असतात. या भाविकांसाठी निवास, भोजन, सांस्कृतिक कार्यक्रमांसाठी जागा आणि आवश्यक सुविधा उपलब्ध करून देण्यासाठी महाराष्ट्र भवन उभारण्याचा प्रस्ताव पत्रात मांडण्यात आला आहे.
राष्ट्रीय एकात्मता अधिक मजबूत होण्यास मदत
यासाठी बोधगया येथे 8 ते 10 एकर योग्य जमीन उपलब्ध करून देण्याची विनंती बिहारच्या मुख्यमंत्र्यांकडे करण्यात आली आहे. विशेष म्हणजे, महाराष्ट्र भवनाच्या बांधकामाचा, विकासाचा आणि देखभालीचा संपूर्ण खर्च महाराष्ट्र शासन करणार असल्याचे संजय शिरसाट यांनी पत्रात स्पष्ट केले आहे. तसेच या प्रकल्पामुळे बिहार आणि महाराष्ट्र यांच्यातील सांस्कृतिक देवाणघेवाण वाढण्यास आणि राष्ट्रीय एकात्मता अधिक मजबूत होण्यास मदत होईल, असेही पत्रात नमूद करण्यात आले आहे. या प्रकल्पासंदर्भात बिहार सरकारशी संपर्क साधण्याचे निर्देश महाराष्ट्राच्या सामाजिक न्याय विभागाला देण्यात आले आहेत.
