महाविकास आघाडीला खिंडार! राष्ट्रवादी, काँग्रेस, ठाकरे सेनेसह मनसेच्या असंख्य पदाधिकाऱ्यांचा शिवसेनेत प्रवेश

गेल्या काही काळापासून राज्याच्या राजकारणात मोठ्या प्रमाणात पक्षांतर होताना पहायला मिळत आहे. अशातच आता मुंबई आणि उपनगराती महाविकास आघाडीला मोठा धक्का बसला आहे. मुंबई, ठाणे, शहापूर, वसई-विरार, नालासोपारा आणि पालघर परिसरातील विविध राजकीय पक्षांतील पदाधिकारी आणि कार्यकर्त्यांनी शिवसेनेत जाहीर प्रवेश केला. राष्ट्रवादी काँग्रेस (शरद पवार गट), काँग्रेस, शिवसेना (उद्धव बाळासाहेब ठाकरे), महाराष्ट्र नवनिर्माण सेना तसेच विविध सामाजिक संघटनांमधील पदाधिकारी आणि कार्यकर्त्यांनी शिवसेनेचा भगवा झेंडा हाती घेतला आहे. याबाबत सविस्तर माहिती जाणून घेऊयात.

मुंबईतील या पदाधिकाऱ्यांचा शिवसेनेत प्रवेश

उपमुख्यमंत्री एकनाथ शिंदे यांच्या उपस्थितीत ठाण्यात हा पक्षप्रवेश पार पडला. यावेळी राष्ट्रवादी काँग्रेस (शरद पवार गट) यांचे दत्ता पाटील आणि त्यांच्या सहकाऱ्यांनी शिवसेनेत प्रवेश केला. तसेच मानखुर्द येथील मनसेचे नेते प्रमोद पाटील यांनी आपल्या कार्यकर्त्यांसह शिवसेनेत प्रवेश केला. मुंबईतील राष्ट्रवादी काँग्रेसचे सरचिटणीस हरिश्चंद्र विश्वासराव, ग्राहक संरक्षण विभागाचे उपाध्यक्ष संजय महाले, सामाजिक कार्यकर्त्या समायरा भारती आणि गौरी कटपरा यांच्यासह कार्यकर्त्यांनीही शिवसेनेत प्रवेश केला.

काँग्रेसच्या मायनॉरिटी विभागाचे माजी अध्यक्ष मोहम्मद अख्तर मलिक आणि त्यांच्या सहकाऱ्यांनीही शिवसेनेत प्रवेश केला. पालघर जिल्ह्यात राष्ट्रवादी काँग्रेस (शरद पवार गट)च्या महिला अध्यक्ष मेघा म्हात्रे, जिल्हा चिटणीस हरेश कोटकर, चंद्रकांत कदम, नालासोपारा विधानसभा अध्यक्ष देवेंद्र शिरोडकर तसेच युवक कार्याध्यक्ष आणि कार्यकर्त्यांनी शिवसेनेत प्रवेश केला.

📍 ठाणे |#मुंबई, #ठाणे, #शहापूर, #वसई– #विरार, #नालासोपारा आणि #पालघर परिसरातील राष्ट्रवादी काँग्रेस (शरद पवार), काँग्रेस, शिवसेना (उद्धव बाळासाहेब ठाकरे), मनसे तसेच विविध सामाजिक संघटनांतील पदाधिकाऱ्यांनी #शिवसेना पक्षात जाहीर प्रवेश केला. यावेळी या सर्वांचे पक्षात स्वागत करून… pic.twitter.com/BXF4MzI48S

— Eknath Shinde – एकनाथ शिंदे (@mieknathshinde) August 22, 2026

त्याचबरोबर पालघरमधील श्रमजीवी संघटनेचे महाराष्ट्र राज्य संघटक रुपेश डोळे, लक्ष्मण फडवले आणि त्यांच्या सहकाऱ्यांनीही शिवसेनेत प्रवेश केला. तर विरार-नालासोपारा परिसरात विधानसभा उपसंघटक श्रद्धा जाधव यांच्या नेतृत्वाखाली विभागप्रमुख दिलीप जाधव, विभागप्रमुख विजय भोसले, उपविभाग प्रमुख गणपत गव्हाळे आणि कार्यकर्ते शिवसेनेत सामील झाले.

शहापूरमधील अनेकांचा शिवसेनेत प्रवेश

ठाण्याच्या शहापूर तालुक्यातील तब्बल 92 लोकप्रतिनिधी आणि पदाधिकाऱ्यांनी त्यांच्या 75 हून अधिक कार्यकर्त्यांसह शिवसेनेत प्रवेश केला. या सामूहिक पक्षप्रवेशामुळे शहापूरसह ठाणे ग्रामीण परिसरात शिवसेनेची संघटनात्मक ताकद वाढल्याचा दावा करण्यात आला. यावेळी एकनाथ शिंदे यांच्याकडून नव्याने पक्षात दाखल झालेल्या कार्यकर्त्यांचे स्वागत करण्यात आले. त्यांच्या भागातील समस्या सोडवण्यासाठी शिवसेना कटिबद्ध असून, ‘तुमच्या हक्काच्या लढाईत मी कायम खंबीरपणे तुमच्या पाठीशी उभा राहीन’ अशी ग्वाही शिंदे यांनी दिली.

या पक्षप्रवेश सोहळ्याला शिवसेना सचिव राम रेपाळे, ठाणे ग्रामीण जिल्हाप्रमुख मारुती धिरडे, पालघर जिल्हाप्रमुख वसंत चव्हाण, शिवसेना प्रवक्ते राहुल लोंढे यांच्यासह मोठ्या संख्येने शिवसेना पदाधिकारी आणि शिवसैनिक उपस्थित होते.