साहेब निघून गेले तर…; मंत्रालयातील लाचखोरीचा स्टिंग ऑपरेशनचा व्हिडीओ समोर, पाहा काय घडलं?

मंत्रालयातील अन्न व औषध प्रशासन विभागातील लाचखोरीच्या प्रकरणामुळे राजकीय वर्तुळात मोठी खळबळ उडाली आहे. यावरुन सध्या विविध चर्चांना उधाण आलेले असताना आता याप्रकरणी आणखी एक मोठी बातमी समोर आली आहे. मंत्रालयातील भ्रष्टाचाराचा पर्दाफाश करणारे एक स्टिंग ऑपरेशन समोर आले आहे. यात विधानसभा उपाध्यक्ष नरहरी झिरवळ यांच्या विभागातील क्लार्क आणि पीए थेट लाचेची मागणी करताना या व्हिडिओमध्ये कैद झाले आहेत.

अन्न आणि औषध प्रशासन विभागातील लिपिक राजेंद्र ढेरिंगे (वय ३५) याला लाचलुचपत प्रतिबंधक विभागाने (ACB) ३५ हजार रुपयांची लाच घेताना रंगेहाथ पकडले होते. मंत्र्यांकडे असलेल्या एका अपील अर्जावर सकारात्मक निकाल देण्यासाठी ही लाच मागण्यात आली होती. एसीबीने केलेल्या कारवाईत ढेरिंगेच्या कार्यालयातून ४२ हजार रुपयांची रोकड जप्त करण्यात आली. तर त्याच्या नाशिकमधील घरावरही छापे टाकून सर्च ऑपरेशन राबवण्यात आले होते. आता याच संदर्भातील एका स्टिंग ऑपेरशनचा व्हिडीओ समोर आला आहे.

हे स्टिंग ऑपरेशन तक्रारदाराने केले आहे. यामध्ये झिरवळांच्या विभागातील क्लार्क राजू ढेरिंगे आणि पीए रामदास गाडे हे ५० हजारांच्या लाचेसाठी तडजोडी करताना दिसत आहेत. टीव्ही ९ मराठीच्या हाती लागलेल्या या स्टिंगमध्ये भ्रष्टाचाराचा उघड नमुना पाहायला मिळत आहे. पण टीव्ही ९ मराठी या स्टिंग ऑपेरशनची पुष्टी करत नाही.

स्टिंगमधील धक्कादायक संभाषण काय?

• रामदास गाडे (झिरवळांचे पीए): “बालाजी का…”
• रामदास गाडे: “सरांची पण माझं बोलणं झालं.”
• रामदास गाडे: “मॅडमचा पण फोन आला होता.”
• रामदास गाडे: “पण चुका तुम्ही केल्यावर त्यामुळे ते आता करुन घे.”
• रामदास गाडे: “तुझी कॅपिसिटी नाही. तुला हे पण पाहिजे. सगळ कसं फुकट होईल. प्लेनचं तिकीट तर काढावं लागेल ना.”
• तक्रारदार: “आता नाही आहे.”
• रामदास गाडे: “काय म्हणतो २५ म्हणतो, तलाठीपण घेत नाही.”
• राजू ढेरिंगे (झिरवळांच्या विभागतील क्लार्क): “तुमच्याकडे कमीत कमी ५० असतील ना… ५० टक्के डिस्काऊंट देतो. ५० घेऊन ये तुमचं काम करुन देतो.”
• तक्रारदार: “तेवढे नाही हो.”
• राजू ढेरिंगे: “साहेब निघून गेले तर पुढच्या हप्त्यावर जाईल.”
• राजू ढेरिंगे: “आता यापुढे काही बोलू नको.”
• तक्रारदार: “थांबा फोन लावू द्या.”

या प्रकरणाची दखल घेण्याची शक्यता

हे स्टिंग ऑपरेशन समोर आल्यानंतर आता एसीबी (लाचलुचपत प्रतिबंधक विभाग) या प्रकरणाची दखल घेण्याची शक्यता आहे. मंत्रालयातील वरिष्ठ अधिकाऱ्यांनीही या प्रकरणाची गंभीर दखल घेतली असून, रामदास गाडे आणि राजू ढेरिंगे यांची चौकशी सुरू करण्यात आली आहे. मंत्रालयातील बड्या नेत्यांच्या दालनात बसून अशा प्रकारे लाचेची मागणी होत असल्याने मोठी खळबळ उडाली आहे. या प्रकरणामुळे झिरवळ यांच्या विभागातील कामकाजावरही प्रश्नचिन्ह उपस्थित केले जात आहेत.

या प्रकरणावर बोलताना नरहरी झिरवळ यांनी स्पष्ट केले की, माझ्या नावाचा वापर करून जर कोणी चुकीचे काम करत असेल, तर त्यावर कठोर कारवाई व्हायला हवी. प्रशासनाने या प्रकरणाची सखोल चौकशी करावी. जे दोषी असतील त्यांच्यावर तात्काळ निलंबनाची कारवाई करण्याचे निर्देश मी दिले आहेत.