आमदार संजय गायकवाड यांच्या मुलाच्या जीवाला धोका? त्या पत्रानं खळबळ

मोठी बातमी समोर येत आहे, बुलढाण्याचे आमदार संजय गायकवाड यांना अज्ञात व्यक्तीनं एक पत्र पाठवलं आहे. या पत्रामुळे चांगलीच खळबळ उडाली आहे. संजय गायकवाड यांच्या मुलाच्या जीवाला धोका असल्याचा दावा या पत्रामध्ये करण्यात आला आहे. दरम्यान यापुर्वीही 2 अशीच पत्र आल्याने आमदार संजय गायकवाड यांनी आता या प्रकरणात कारवाईची मागणी केली आहे. मात्र हे पत्र नेमकं कोणी पाठवलं? हे अद्याप स्पष्ट होऊ शकलेलं नाहीये.

पत्रात नेमकं काय म्हटलं? 

“तुम्हाला पत्र लिहिण्याचे कारण की, तुम्हाला एक गोपनीय माहिती द्यायची आहे. तुमचे जुने सहकारी समाधान मोरे व त्यांचा भाचा रितेश खिल्लारे यांच्यामुळे तुमच्या धाकट्या मुलाला मृत्यूंजय गायकवाडच्या जीवाला धोका आहे.

त्याला मारण्याची त्यांनी सुपारी बांधून घेतली असून ते त्या कार्यासाठी सक्रीय झाले आहेत. त्यांची अशी मिटिंग झाली आहे. तरी आपण व आपले कुंटुंब यांचे रक्षण करावे. मी त्याच्या जवळची व्यक्ती असून मी प्रकट स्वरूपात येऊ शकत नाही. तुम्ही तुमच्या कुटुंबाच्या सुरक्षिततेसाठी लवकरात लवकर पाऊल उचलावे. वेळ निघून गेल्यावर काहीही उरणार नाही. छत्रपती शिवाजी महाराज आपले दैवत आहे. तुमचे आणि माझे ही. शिवरायांच्या चरणाची शपथ हा मजकूर खोटा नाही. आपण सतर्क राहावे.

टीप – वरील मजकूर हा खोटा नसून हा सत्य आहे. यामध्ये माझा कोणताच वैयक्तिक फायदा नसून, केवळ तुमच्या कुटुंबाप्रती काळजी आहे, म्हणून पत्राद्वारे तुम्हाला कळवत आहे. मृत्यूंजय दादांची काळजी घ्या, आई भवानी त्यांना उदंड आयुष्य लाभो हीच प्रार्थना, आपला शुभचिंतक” असा मजकूर या पत्रामध्ये आहे.

दरम्यान यापूर्वी देखील 2 अशीच पत्र आल्याने आमदार संजय गायकवाड यांनी आता या प्रकरणात कारवाईची मागणी केली आहे. या संदर्भात ते उपमुख्यमंत्री एकनाथ शिंदे यांच्याशी देखील बोलणार आहेत. मात्र हे पत्र कोणी पाठवलं,  हे अद्याप समोर येऊ शकलेलं नाहीये.