विजेचं कनेक्शन कापायला आले तर शॉक देणार, मनसेचा राज्य सरकारला इशारा

मुंबई : वाढीव वीजबिलाविरोधात मनसेने (MNS) राज्यव्यापी आंदोलन छेडले आहे. राज्यात ठिकठिकाणी मनसेकडून ‘झटका मोर्चा’च्या माध्यमातून वाढीव वीजबिल माफ करण्याची मागणी करण्यात येत आहे. यावेळी वांद्रे येथे जिल्हाधिकारी कार्यलयावर मोर्चा काढण्यात आला. (MNS march against increased electricity bill)

या मोर्चात मनसेचे कार्यकर्ते मोठ्या संख्येने उपस्थित होते. यावेळी कार्यकर्त्यांकडून राज्य सरकारविरोधात घोषणा देण्यात आल्या. तसेच, नागरिकांचे वाढीव वीजबिल माफ करण्याची मागणी करण्यात आली.

वीज दरवाढीसंदर्भाबाबत यापूर्वी मनसेने राज्यपाल भगतसिंग कोश्यारी यांची भेट घेतली होती. त्यावेळी मनसेने वीज दरवाढ कमी करण्यासंदर्भात राज्यपालांना निवेदन दिलं होत. त्यानंतर मनसेने आंदोलनाचे हत्यार उपसले आहे. यावेळी, राज्य सरकार वीजबिलाच्या प्रश्नावर गंभीर असल्याचं दिसत नाही, असा आरोप मनसेने केला. याच कारणामुळे मनसेतर्फे वांद्रे येथील जिल्हाधिकारी कार्यालयावर महामोर्चाचे आयोजन करण्यात आले. यावेळी आंदोलनाच्या माध्यमातून सरकारला हा अंतिम इशारा असल्याचे मनसेकडून सांगण्यात आले.

… तर शॉक देणार

तसेच, यापुढे आता वीज ग्राहक वाढीव वीजबिल भरणार नाही. बील भरले नाही म्हणून जर एमएसईबी आणि वीज कंपनीचे अधिकारी कनेक्शन कापायला आले, तर त्यांना शॉक देणार, असा इशारा मनसेच्या नेत्यांनी यावेळी दिला.

दरम्यान, मुंबई पोलिसांनी या मोर्चाला परवानगी नाकारली होती. मात्र, मोर्चा काढण्यावर मनसे नेते ठाम असल्याने वांद्रे जिल्हाधिकारी कार्यालय परिसरात मोठ्या प्रमाणात पोलीस तैनात करण्यात आले होते. या मोर्चामध्ये कुठल्याही प्रकारचा अनुचित प्रकार घडला नाही. हा मोर्चा शांतपणे पार पडला. यावेळी मनसेच्या शिष्टमंडळाने जिल्हाधिकाऱ्यांची भेट घेत त्यांना निवेदन दिले. यावेळी नागरिकांना वीजबिलाबाबत तत्काळ दिलासा द्यावा अशी मागणी मनसेने केली.

तसेच, जर आमच्या मागण्या मान्य झाल्या नाही तर आगामी काळातही आमची मोर्चाची तयारी आहे. मनसेला नोटीस पाठवा किंवा कार्यकर्त्यांची धरपकड करा आम्ही घाबरत नाही, असा इशाराही मनसेचे सरचिटणीस संदीप देशपांडे यांनी सरकारला दिला. (MNS march against increased electricity bill)

PHOTO | वाढीव वीजबिलाविरोधात मनसेचा राज्यभर ‘झटका मोर्चा’#mns #RajThackeray #electrictybills #Maharashtra #balanandagaonkar @mnsadhikrut @BalaNandgaonkar https://t.co/Ra3ioEDWml

— TV9 Marathi (@TV9Marathi) November 26, 2020

संबंधित बातम्या :

पुण्यात पंतप्रधान मोदींचा मार्ग अडवणार, मराठा क्रांती ठोक मोर्चाचा एल्गार

MNS Morcha Against Electricity Bill ! राज्यभरात मनसेचा आंदोलनाचा ‘झटका’; मुंबईत विराट मोर्चा, तर ठाण्यात पोलीस-मनसे कार्यकर्त्यांत बाचाबाची

‘कितीही दबावतंत्र वापरले तरी ‘झटका मोर्चा’ होणारच’ मनसे भूमिकेवर ठाम