Devendra Fadnavis Rally: औरंगाबादमध्ये राज ठाकरे, तर मुंबईत देवेंद्र फडणवीस महाविकास आघाडीला घेरणार; भाजपची रविवारी बुस्टर डोस सभा

मुंबई: एकीकडे मनसे अध्यक्ष राज ठाकरे (raj thackeray) यांनी 1 मे रोजी औरंगाबादेत जाहीर सभा आयोजित केली आहे. या सभेतून राज ठाकरे महाविकास आघाडीला (maha vikas aghadi) घेरणार आहेत. तर, दुसरीकडे त्याच दिवशी मुंबईत विरोधी पक्षनेते देवेंद्र फडणवीस (devendra fadnavis) यांची मुंबईत अतिविराट सभा पार पडणार आहे. भाजपने या सभेला बुस्टर डोस सभा असं टायटलं दिलं आहे. या सभेतून शिवसेनेची आणि महाविकास आघाडीची पोलखोल करण्यात येणार आहे. या सभेतून भाजप कार्यकर्त्यांना बुस्टर देण्यात येणार आहे. तर विरोधकांना डोस देण्यात येणार असल्याचं भाजपचे नेते, आमदार आशिष शेलार यांनी सांगितलं. त्यामुळे भाजपच्या या सभेतून आघाडी सरकारवर जोरदार हल्लाबोल होणार असल्याचे संकेत मिळत आहेत. त्याशिवाय या सभेतून भाजप महापालिका निवडणुकीचे रणशिंग फुंकणार असल्याचंही सांगितलं जात आहे.

आशिष शेलार यांनी पत्रकार परिषद घेऊन या सभेची माहिती दिली. महाराष्ट्रात दिनानिमित्त एक रंगारंग सांस्कृतिक कार्यक्रम आम्ही आयोजित केला आहे. कोरोना नंतर केवळ भाजपने एवढा मोठा आणि रंगाने भरलेला सांस्कृतिक कार्यक्रम सोहळा आयोजित केला आहे. येत्या 1 मे रोजी होणाऱ्या या कार्यक्रमासाठी मुंबईतील बुथ प्रमुख, हजारो कार्यकर्ते मुंबईतील सोमय्या ग्राऊंडवर उत्साहात आणि आनंदात येणार आहेत. या सोहळ्यात माजी मुख्यमंत्री फडणवीस यांची बुस्टर डोस सभा होणार आहे. या सभेतून कार्यकर्त्यांना बुस्टर आणि शिवसेनेसहीत महाविकास आघाडीला कडकडीत डोस देण्यात येणार असल्याचं आशिष शेलार यांनी सांगितलं.

शिवसेनेची पोलखोल करू

गेल्या काही दिवसात काळोखात मेट्रोच्या कारशेडच्या पत्र्याच्या मागे लपून एक दोन लोकं एकत्रं येऊन दगड मारण्याचा प्रयत्न करत आहेत. भाजपच्या पोलखोल सभेला घाबरून हे कृत्य केलं जात आहे. शिवसेनेचे कर्मकांड आम्ही जनतेसमोर आणले. काही लोक 14 मे रोजी सभा घेणार आहेत. कोणी 30 मे रोजी सभा घेणार आहेत. तर कोणी 1 मे रोजीच सभा घेत आहे. मात्र, भाजपची 1 मे रोजीची पोलखोल सभा सर्वात मोठी असणार आहे. या सभेतून देवेंद्र फडणवीस विरोधकांना डोस देतील. तसेच शिवसेनेची आम्ही पूर्णपणे पोलखोल करू, असा इशाराही त्यांनी दिला आहे.

राज ठाकरेंची तोफ धडाडणार

दरम्यान, मनसे अध्यक्ष राज ठाकरे यांची येत्या 1 मे रोजी औरंगाबादेत जाहीर सभा होत आहे. राज यांनी भोंग्यांचा विषय हातात घेतल्याने ते या सभेत काय बोलणार याकडे सर्वांचं लक्ष लागलं आहे.